Гомель. Кастусь Жукоўскі і яго дачка

Супрацоўнікі аддзела адукацыі адміністрацыі Цэнтральнага раёна Гомеля абследавалі ўмовы, у якіх жыве пяцігадовая дачка апазіцыянера Канстанціна Жукоўскага.

«Раней суседзі расказалі, што да іх прыходзіла міліцыя і апытвала наконт нашай сям’і — як мы жывем, ці не лаемся, не скандалім. Затым да нас прыйшлі пяць жанчын з аддзела адукацыі з мэтай праверыць, у якіх умовах жыве мая дачка», — паведаміў БелаПАН Жукоўскі. Гэтыя дзеянні ён расцаніў як націск на яго і сям’ю.

Супрацоўнікі аддзела адукацыі паказалі апазіцыянеру дакумент, з якога вынікала, што начальнік аддзела адукацыі ў межах рэалізацыі дэкрэта прэзідэнта № 18 «просіць неадкладна правесці абследаванне і падаць акт абследавання жыллёва-бытавых умоў» па адрасе, дзе пражывае Жукоўскі з жонкай і дачкой. Таксама ў дакуменце згадвалася, што абследаванне ўмоў жыцця дзіцяці звязана з тым, што Жукоўскі паводле пастановы суда Петрыкаўскага раёна адбываў пакаранне — 10 сутак арышту.

Як паведамлялася раней, апазіцыянера збілі невядомыя на фестывалі «Покліч Палесся» ў Петрыкаўскім раёне, і яго ж суд пакараў арыштам нібыта за нецэнзурную лаянку і супраціўленне работнікам міліцыі. «Не першы раз мяне пераследавалі за мае перакананні і палітычную дзейнасць і саджалі на суткі, штрафавалі на буйныя сумы. Цяпер яны ўжо і да дачкі дабраліся», — адзначыў Жукоўскі.

Паводле слоў актывіста апазіцыі, у акце абследавання бытавых умоў ён зрабіў заўвагу, што ў яго дачкі ўмовы жыцця «горшыя, чым у хлопчыка Колі Лукашэнкі, але лепшыя, чым у многіх беларускіх дзяцей».

«Верагодна, улады не ведаюць, як знайсці кампрамат на мяне, і ў гэтых пошуках не грэбуюць любымі метадамі, аж да таго, каб абвінаваціць мяне ў неналежным доглядзе за дзіцем», — лічыць Жукоўскі.