Аляксандр Лукашэнка запрашае Кітай да супрацоўніцтва па многіх праектах аж да будаўніцтва АЭС
Аб гэтым кіраўнік беларускай дзяржавы заявіў учора на сустрэчы ў Мінску з намеснікам Старшыні Кітайскай Народнай Рэспублікі Сі Цзіньпінам, перадае БЕЛТА.
"Сёння за кітайскія сродкі мы рэалізуем у Беларусі праекты прыкладна на $1 млрд. Лічу, што гэты вектар мае патрэбу ў істотным пашырэнні", — сказаў Аляксандр Лукашэнка. Ён адзначыў даволі высокі ўзровень гандлёва-эканамічнага супрацоўніцтва дзвюх краін: "Помню, некалі мы марылі дасягнуць тавараабарот у $500 млн, а сёння ў нас ужо ёсць амаль $2,5 млрд тавараабароту ў год".
Прэзідэнт падзякаваў кітайскаму боку за падтрымку Беларусі на міжнароднай арэне, а таксама за вялікую дапамогу, што аказваецца ў галіне эканомікі і фінансаў. Гаворачы аб палітычных пытаннях, кіраўнік дзяржавы звярнуў увагу на падабенства пазіцый па асноўных пытаннях міжнароднага парадку дня, прычым у Беларусі і Кітая ніколі не было разыходжанняў па гэтых пытаннях.
Звяртаючыся да госця, Аляксандр Лукашэнка падкрэсліў, што Сі Цзіньпін прыехаў "не проста ў дружалюбную краіну, а практычна на сваю радзіму". "Я гэта гавару не для таго, каб выклікаць прыхільнасць да сябе, сваёй краіны. Я асабіста знаёмы з КНР на працягу 20 гадоў і вельмі добра ведаю, што ўсходнія людзі, асабліва кітайцы, вельмі асцярожныя, але калі ідуць насустрач, то гэта назаўсёды", — адзначыў Прэзідэнт. "Мы сапраўды вельмі доўга прыглядаліся адзін да аднаго, асабліва Кітай вывучаў нашу краіну, палітыку, — дадаў кіраўнік дзяржавы. — Але ўсё тое, што зрабіў Кітай за апошнія 3-5 гадоў, і дае магчымасць сёння сказаць, што вы прыехалі ў сваю рэспубліку".
Кіраўніцтва КНР высока ацэньвае антыкрызісную палітыку Беларусі. Аб гэтым заявіў намеснік Старшыні Кітайскай Народнай Рэспублікі Сі Цзіньпін. "Нягледзячы на сусветны фінансава-эканамічны крызіс, у Беларусі ўдаецца захаваць палітычную стабільнасць, эканамічны рост і павышэнне дабрабыту насельніцтва, — адзначыў высокі госць. — Гэта значыць, што мы дасягнулі поспехаў у процідзеянні наступствам сусветнага крызісу". Паводле слоў намесніка Старшыні КНР, Аляксандр Лукашэнка — "вялікі сябар кітайскага народа". "Мы заўсёды з пільнай увагай сачылі за вашымі крокамі па развіцці беларускай эканомікі і высока ацэньваем поспехі краіны, дасягнутыя ў нядаўнім часе", — сказаў Сі Цзіньпін.
Ён павіншаваў Прэзідэнта з поспехамі беларускай каманды на зімовых Алімпійскіх гульнях у Ванкуверы. У адказ Аляксандр Лукашэнка пажартаваў: "Гэта добра, што ў Кітаі не так развіты зімовыя віды спорту, а то ніхто б акрамя вас нічога не змог бы на іх заваяваць. Але мы ўсё роўна за вас балеем, мы балелі за вас на летніх Алімпійскіх гульнях — не чужыя ж нам людзі".
Сі Цзіньпін таксама адзначыў, што Прэзідэнт Беларусі ўдзельнічаў у цырымоніі адкрыцця Алімпійскіх гульняў у Пекіне ў 2008 годзе. "Мы лічым, што гэта сведчыць аб вашай падтрымцы кітайскай дзяржавы", — сказаў намеснік Старшыні КНР.