Як вы захоўваеце ўспаміны пра самыя яркія моманты жыцця?
— Першае, гэта фотаздымкі. Сёння большасць з іх захоўваецца ў электронным выглядзе, але кожны месяц нейкую частку я друкую. Нават альбомы спецыяльна купляю. А вось музыка дазваляе ажывіць яркія моманты і ўспаміны зусім нечакана, бо песню вы можаце пачуць у краме, у аўтобусе. На мой погляд, самая вялікая "скарбонка" 
ўспамінаў — гэта родныя і сябры. Бо з часцінак успамінаў кожнага можна аднавіць тыя часы, якія вас збіралі разам. Таксама я вяду дзённік маёй дачкі Насценькі. Там я раблю запісы пра самыя яркія моманты яе жыцця: калі сказала першае слова, калі зрабіла нешта важнае. Уклейваю туды фотаздымкі, паштоўкі. Хачу, каб яна працягвала рабіць такія запісы, калі вырасце.
Па-першае, робім і збіраем фотаздымкі. Зараз яны захоўваюцца і на камп'ютары, і ў спецыяльных альбомах. Асобныя — самыя значныя і яскравыя — фота раздрукоўваем і захоўваем у рамачках. Па-другое, разам з блізкімі мы прывозім з розных паездак памятныя значкі ці магніцікі. Таксама ў маёй сям'і ёсць свайго роду традыцыя дарыць "альбомы жыцця", іх называюць яшчэ скрэпбукі, да юбілеяў і святочных дат. Такі альбом змяшчае фотаздымкі ад нараджэння і да бягучага моманту жыцця таго чалавека, якому адрасуецца. А яшчэ, паколькі я, акрамя працы, займаюся творчасцю, то некаторыя моманты ўдаецца зберагчы, напрыклад, у вершаванай форме, у выглядзе замалёвак лірычнага, патрыятычнага, пейзажнага, шаржавага, гумарыстычнага характара.
Аляксандра ВАЯВОДЗІНА, рэдактар аналітычнага аддзела тэлеканала АНТ:— Безумоўна, самы просты спосаб — гэта захаваць імгненні з дапамогай фота і відэа. Мне ўспамінаюцца словы Гётэ: "Спыніся, імгненне, ты цудоўнае". Сёння з дапамогай інфармацыйных ноу-хау зрабіць гэта яшчэ лягчэй. Але для мяне лепшы спосаб захаваць успаміны пра яркія эпізоды жыцця — гэта падзяліцца імі з блізкім чалавекам. Ад гэтага яны набываюць дадатковыя фарбы, і тады іх дакладна немагчыма забыць. Дзелячыся прыемнымі момантамі з любімымі людзьмі, ты пражываеш іх зноў і зноў. Яшчэ я стараюся з кожнага падарожжа прывозіць нейкія рэчы, якія характарызуюць тое месца, дзе я пабывала. Такія сувеніры становяцца "абярэгам" дарагіх успамінаў.
Падрыхтавала Алена ДРАПКО.