Чаму педагогі не атрымлівалі кампенсацыю на літаратуру?

"Звязда" днямі паведаміла аб павышэнні кампенсацыйнай выплаты на набыццё педагогамі метадычнай літаратуры. Аднак ужо даўно "школьнае начальства" без дай прычыны адмяніла штомесячныя выплаты той хвалёнай кампенсацыі. Маўляў, з ёй адна толькі марока...

Масей Бяспалы, Гомельская вобласць.

Як запэўнілі журналіста "Звязды" ў Міністэрстве адукацыі, у выплату бліжэйшай зарплаты (у большасці рэгіёнаў гэта пачатак снежня) педагогам будуць выплачаны адначасова тры кампенсацыі — за кастрычнік, лістапад і снежань, паколькі пастанова Міністэрства адукацыі распаўсюджвае сваё дзеянне на адносіны, якія ўзніклі з 1 кастрычніка 2011 года. Згодна з дакументам, кампенсацыя будзе выплачвацца па асноўным месцы работы пры ўмове занятасці (педагагічнай нагрузцы) не менш як 0,5 штатнай адзінкі (стаўкі). За кожны з трох месяцаў (кастрычнік, лістапад і снежань) педагогі атрымаюць кампенсацыю на набыццё вучэбнай, метадычнай літаратуры і перыядычных выданняў у памеры 22 650 рублёў. Кампенсацыя будзе выплачвацца незалежна ад знаходжання педагагічнага работніка ў працоўным водпуску, водпуску па цяжарнасці і родах, водпуску па доглядзе дзіцяці да трох гадоў, незалежна ад адсутнасці педагагічнага работніка на працы па прычыне часовай непрацаздольнасці. Захоўваецца выплата кампенсацыі і на час павышэння педагагічнымі работнікамі сваёй кваліфікацыі, перападрыхтоўкі, а таксама стажыроўкі кіруючых работнікаў і спецыялістаў.

Надзея Нікалаева.