Якія асацыяцыі і ўспаміны ў вас выклікае восень?

22 верасня лічыцца мяжой паміж астранамічнымі летам і восенню. Сёлета нам пашанцавала: выцягваць цёплыя шапкі і шалікі пакуль не трэба. Але восень яшчэ паспее паказаць свой нораў. Цікава, а якія падзеі свайго жыцця беларусы атаясамліваюць з восенню?

Ганна Дрозд, студэнтка БДУ:

— У мяне дзень народзінаў увосень — гэта галоўная падзея. А ўвогуле асноўныя асацыяцыі: пах сырасці; кавярня, кава і джаз; і нават каханне.

Віталь Рыжковіч, дызайнер:

— Я ад пэўнай пары года не надта залежу, калі пра настрой разважаць. але ж восенню ў мяне заўжды пачынаюцца нейкія змены. Гадоў сем таму, калі быў яшчэ школьнікам, менавіта восенню вырашыў адрасціць доўгія валасы, за што на мяне вельмі сварыліся настаўнікі. Яшчэ, відаць, з гэтай парой я звязваю свой пераезд у Мінск. Паступіў вучыцца ва ўніверсітэт, а заняткі ж у верасні пачынаюцца.

Вольга Хамук, бухгалтар, Івацэвіцкі раён:

— Жыву ў вёсцы, таму восень для мяне — гэта пераважна клопаты пра запасы на зіму. Калі верасень толькі пачынаецца, галава кругам ідзе ад думак, колькі ўсяго трэба сабраць і схаваць у склеп. Шчыра скажу, што больш радуюся, калі зіма прыходзіць. Пасля ўсіх гэтых восеньскіх клопатаў — нібы выратаванне.

Паліна Барташэвіч, будучы псіхолаг:

— Думаю, усе самыя глабальныя падзеі ў маім жыцці пакуль наперадзе. Восень выклікае ў мяне асацыяцыі з ціхімі вечарамі і праглядам добрага кіно ў прыемнай кампаніі. А яшчэ з яблычным пірагом. Мы штогод восенню прывозім шмат яблыкаў з бабулінай дачы.

Крысціна, студэнтка архітэктурнага факультэта БНТУ:

— Напэўна, вучоба. Я не люблю восень: гэта халоднае надвор'е, а значыць псуецца настрой, прыходзяць хваробы.

Ганна ГАРУСТОВІЧ, Уладзіслаў КУЛЕЦКІ.