Сямнаццаць дранікаў за тры хвіліны
Чэмпіянат па хуткасным паяданні дранікаў прайшоў у Мінску
З вялікай колькасці ахвотных прыняць удзел у цікавым і сытным чэмпіянаце ў фінал выйшла сем шчасліўчыкаў — менавіта ім патрэбна было за тры хвіліны з'есці дваццаць дранікаў (столькі было ў кожнага ўдзельніка на талерцы). Але ж дранікі могуць быць розныя — па памеры, па таўшчыні, таму перад конкурсам усе талеркі былі старанна ўзважаны.
Самым хуткім аказаўся Віталь Лукашонак, які асіліў сямнаццаць дранікаў з дваццаці і толькі на сем грамаў апярэдзіў свайго саперніка.
— Паўдзельнічаў, а заадно і пад'еў, — усміхнуся сваёй перамозе Віталь.
Іншыя ж удзельнікі выказалі жаданне дранікі даесці, праўда, ужо без уліку часу, а некаторыя папрасілі смятаны.
На чэмпіянаце прысутнічаў прадстаўнік Беларусі, сааўтар і член рэдакцыйнай калегіі Кнігі рэкордаў краін СНД і Балтыі "Дзіва" Аляксандр Калінін, які і зафіксаваў рэкорд.
— Беларусы не першы раз спрабуюць паставіць самыя высокія рэкорды, але ў асноўным у так названых "фізічна-сілавых" намінацыях — працягнуць самалёт ці танк, — распавядае Аляксандр Калінін. — А вось фіксацыя паядання дранікаў на маёй памяці — упершыню.
Дарэчы, таксама будзе пададзена заяўка на фіксацыю рэкорда ў Кнігу рэкордаў Гінеса, таму, магчыма, беларусы стануць новымі рэкардсменамі па хуткасным паяданні традыцыйнай беларускай стравы.
Марына БЕГУНКОВА, фота аўтара.