Аграрыі — нямодныя, а эканамісты — незапатрабаваныя

Прафесійныя памкненні маладых людзей разыходзяцца з рэальным жыццём: першыя вынікі сёлетняй уступнай кампаніі ў Магілёўскай вобласці супярэчаць сітуацыі на рынку працы.

Самымі запатрабаванымі прафесіямі ў абітурыентаў рэгіёна па-ранейшаму застаюцца юрысты і эканамісты. Між тым, рынак працы даўно перапоўнены гэтымі спецыялістамі: напрыклад, у Магілёве ў цэнтры занятасці ёсць толькі адна вакансія юрыста на 23 суіскальнікаў, а 99 эканамістаў прэтэндуюць на 3 рэальныя працоўныя месцы.

Вельмі папулярнай з'яўляецца спецыяльнасць "Фінансы і крэдыт" у Беларуска-Расійскім універсітэце. Конкурс на платную форму дзённага навучання склаў 6 чалавек на месца: маладыя людзі (і іх бацькі) хочуць быць бліжэй да грошай. А вось, напрыклад, стаць спецыялістам у галіне сельскай гаспадаркі — сёння не самая актуальная моладзевая мара. У Беларускай сельскагаспадарчай акадэміі не назіралася ажыятажу, а менавіта выпускнікі гэтай паважанай навучальнай установы маюць вялікія магчымасці для паспяховага працаўладкавання. Што датычыцца працоўных прафесій, то самымі запатрабаванымі на рынку працы і, акрамя таго, высокааплатнымі застаюцца будаўнікі.

Ілона Іванова.