Крокам марш!

У таго, хто толькі і робіць, што сядзіць, узнікае гіпакінезія — недастатковасць рухальнай актыўнасці, пры якой фактычна немагчыма гаварыць пра здароўе.

Паводле слоў урача-педыятра 2-й гарадской дзіцячай паліклінікі г. Мінска Алены ЗВЯРУГІ, у першую чаргу пакутуе цяглічная сістэма, яна практычна атрафіруецца. Пакутуюць і косці. Каб мы маглі абапірацца на шкілет, ён павінен быць трывалым. Падчас бегу, напрыклад, ударныя нагрузкі на касцявую тканку складаюць да 6 мас цела чалавека, таму косці вымушаны паступова ўмацоўвацца. Калі ж чалавек не рухаецца, арганізму здаецца, што трываласць шкілету не патрэбная, і косць становіцца лёгкай, губляе кальцый. Нават пры збалансаваным харчаванні, ужыванні мінеральных комплексаў кальцый амаль не будзе засвойвацца, а значыць, тут недалёка і да астэапарозу.

Маларухомым ладам жыцця абумоўлены і атэрасклероз, і каранарная хвароба сэрца. Амерыканская Асацыяцыя медыкаў у барацьбе з атэрасклерозам прапісвае займацца фітнэсам 5-6 разоў на тыдні па 30-40 хвілін з пульсам не менш за 100 удараў у хвіліну. Можна проста хадзіць бадзёрым крокам — 1 км за 8-9 хвілін.

У галаўным мозгу ёсць так званы цэнтр рэтыкулярнай інфармацыі. Ён падтрымлівае ўстаноўлены ўзровень актыўнасці цэнтральнай нервовай сістэмы ў цэлым. Гэтая сістэма працуе за кошт нашых адчуванняў і ўражанняў — калі мы бачым, чуем, да чагосьці дакранаемся і г.д. Вялікая доля прыпадае на інфармацыю ад рухальнай сістэмы. Пры нерухомым ладзе жыцця цэнтральнай нервовай сістэме хранічна не стае актывацыі. Атрымліваецца, калі мы мала рухаемся, то і думаем не так, як належыць.

Дыябет 2 тыпу з поспехам лечыцца цяглічнай нагрузкай у спалучэнні з дыетай. Ад пастаянных трэніровак адчувальнасць рэцэптараў да інсуліну павышаецца. Акрамя таго, у гэты час клетачныя мембраны становяцца больш пранікальнымі для глюкозы. Так што пасільныя нагрузкі вельмі патрэбныя дыябетыку 2 тыпу. Падчас фізічнай нагрузкі трэніруецца і гарманальная сістэма.

Гэта дапаможа вам больш рухацца і ўмацоўваць цягліцы.

1. Раніцай пасля сну сядзьце з выпрастанай спінай, устаньце на дыбачкі.

2. На прагулцы не абыходзьце камяні і лужы. Кожны скачок надае лёгкасць хадзе і захоўвае гнуткасць ног.

3. Раніцай і ўвечары, падчас чысткі зубоў, уставайце на дыбачкі, напружвайце цягліцы ног і сцёгнаў.

4. Імкніцеся не карыстацца ліфтам. Добра ісці па лесвіцы праз адну прыступку.

5. Нахіляйцеся, не згінаючы ногі ў каленях. Спіну імкніцеся трымаць прама.

6. Уставайце з ложка і крэсла без дапамогі рук.

7. Падчас выканання хатняй працы прысядайце з выпрастанай спінай і напружанымі цягліцамі ног.

8. Не прысядайце і шчыльна злучайце ступні падчас чысткі туфляў.

9. Каб паглядзець назад ці ўбок, паварочвайце толькі галаву.

10. Штодня некалькі хвілін хадзіце дома на дыбачках, з кнігай на галаве.

Святлана БАРЫСЕНКА.