Беларускія банкі перастануць спаганяць камісійныя плацяжы за карыстанне крэдытам у студзені 2013 года
Прэзідэнт Беларусі Аляксандр Лукашэнка 13 ліпеня падпісаў закон, якім уносяцца дапаўненні і змяненні ў Банкаўскі кодэкс Беларусі. Дакумент афіцыйна апублікаваны 21 ліпеня на Нацыянальным прававым інтэрнэт-партале.
Закон "Аб унясенні дапаўненняў і змяненняў у Банкаўскі кодэкс Рэспублікі Беларусь" быў прыняты Палатай прадстаўнікоў 27 чэрвеня і адобраны Саветам Рэспублікі 29 чэрвеня.
Дакумент замацоўвае азначэнне паняцця "электронныя грошы" — гэта легалізуе абарачэнне такіх сродкаў плацяжу, а таксама адмяняе камісійныя і іншыя плацяжы за карыстанне крэдытам (акрамя працэнтаў за карыстанне крэдытам), што прывядзе да празрыстасці і прадказальнасці адносін банка з кліентамі.
На аснове рэкамендацый Міжнароднага валютнага фонду і Сусветнага банка прадугледжваецца ўзмацненне аперацыйнай і фінансавай незалежнасці Нацыянальнага банка Беларусі, удасканальваюцца працэдуры ў галіне нагляду за ажыццяўленнем банкаўскай дзейнасці, а таксама на кансалідаванай аснове за дзейнасцю банкаўскіх груп і банкаўскіх холдынгаў.
За Нацыянальным банкам замацоўваецца новая функцыя — ажыццяўленне маніторынгу фінансавай стабільнасці, аб'ектамі якога будуць з'яўляцца не толькі банкі і нябанкаўскія крэдытна-фінансавыя арганізацыі, але і фінансавыя пасрэднікі, фінансавыя рынкі і плацежная сістэма ў цэлым.
Для далейшай лібералізацыі эканамічных адносін законам прадугледжваецца спрашчэнне працэдур дзяржаўнай рэгістрацыі і ліцэнзавання банкаў. Пры гэтым прадугледжваецца, што банкі могуць стварацца выключна ў форме акцыянерных таварыстваў, а таксама ўстанаўліваюцца жорсткія патрабаванні да карпаратыўнага кіравання і кіравання рызыкамі, ажыццяўлення ўнутранага кантролю і аўдыту.
"Гэты закон уступае ў сілу праз шэсць месяцаў пасля яго афіцыйнага апублікавання, за выключэннем артыкулаў 3 і 4, якія ўступаюць у сілу з дня афіцыйнага апублікавання гэтага закона, а таксама абзацаў другога і чацвёртага пункта 39, абзаца другога пункта 103 і пункта 115 артыкула 1 гэтага закона, якія ўступаюць у сілу 1 студзеня 2014 года", — гаворыцца ў дакуменце.