Каля беларуска-польскай мяжы памежнікі злавілі рыбакоў з вінтоўкай
Фота: gpk.gov.by
19 чэрвеня брэсцкія пагранічнікі затрымалі за 1,5 км ад беларуска-польскай мяжы бацьку і сына — жыхароў Брэста. Брэстаўчан затрымалі за парушэнне памежнага рэжыму. Мужчыны заявілі, што на рэжымную тэрыторыю прыбылі на рыбную лоўлю, але забыліся дакументы.
У аўтамабілі, на якім прыехалі рыбакі, памежнікі выявілі два пакеты з рыбалоўнымі сеткамі па 45 м кожная, вінтоўку калібра 5,5 мм невядомага ўзору і свежавылаўленую рыбу. А ў зменным абутку яны знайшлі затвор ад вінтоўкі і прыстасаванне для бясшумнай стральбы, паведамляе прэс-служба Памежнага камітэта.
Для разбіральніцтва былі прыцягнутыя міліцыянты Брэсцкага РАУС, а таксама супрацоўнікі Дзяржаўнай інспекцыі аховы жывёльнага і расліннага свету. Вінтоўка, незаконны ўлоў і рыбалоўныя сеткі канфіскаваныя.
За незаконнае перасячэнне дзяржаўнай мяжы і парушэнне памежнага рэжыму на рыбакоў пачалі адміністрацыйную справу. На 62-гадовага бацьку склалі адміністрацыйны пратакол за парушэнне правілаў рыбалоўства і аховы рыбных рэсурсаў і водных жывёл.
Акрамя таго міліцыянты правяраюць, ці няма ў яго дзеяннях крымінальнага злачынства — незаконных дзеянняў у адносінах да агнястрэльнай зброі, боепрыпасаў і выбуховых рэчываў.