У Мінску моцны вецер паваліў дрэва на тры аўто, у тым лiку хуткую дапамогу

Навальніца з моцным ветрам паваліла ў мінскім двары дрэва на тры аўтамабілі. Здарэнне адбылося ўвечары 20 чэрвеня ў двары дома на вуліцы Гая, піша tut.by са словаў афіцыйнай прадстаўніцы МНС Мінска Вольгі Мельчанка.

Моцны парыў ветра паваліў дрэва на аўтамабіль хуткай дапамогі, які прыбыў на выклік, а таксама прыпаркаваныя ў двары Volkswagen T4 і Volkswagen Polo.

Пацярпелых пры здарэнні няма. Ратавальнікі аператыўна распілавалі дрэва і вызвалілі аўтамабілі, якія атрымалі нязначныя пашкоджанні. 

Перад сённяшняй навальніцай службы МНС зрабілі СМС-рассылку, у якой папярэдзілі пра моцны вецер.