Жыхар Віцебска атрымаў пажыццёвы тэрмін за забойства дваіх чалавек
Фота: Fotolia
Жыхар Віцебска атрымаў пажыццёвы тэрмін за забойства дваіх чалавек. Яшчэ адзін мужчына атрымаў 16 гадоў зняволення.
Як інфармуе sputnik.by, каля года таму ў Віцебску на кватэры аднаго з асуджаных кампанія маладых людзей ужывала алкаголь, наркотыкі, курыла кальян. Аднак пасля двое з іх бітамі забілі да смерці мужчыну і жанчыну, яшчэ адзін чалавек атрымаў цяжкія цялесныя пашкоджанні. Тады ж былі затрыманыя зламыснікі.
Як паведаміла прэс-сакратар абласнога суда Наталля Платаненка, аднаго з мужчын прызналі вінаватым у "наўмысным забойстве, учыненым з асаблівай жорсткасцю", а таксама "ў замаху на наўмыснае супрацьпраўнае пазбаўленне жыцця трох асобаў (забойстве), які быў здзейснены з асаблівай жорсткасцю групай асобаў". Ён атрымаў пажыццёвае зняволенне.
Другога мужчыну прызналі вінаватым у "замаху на наўмыснае забойства, учыненае з асаблівай жорсткасцю, групай асобаў". 16 гадоў ён мусіць адбыць у папраўчай калоніі ва ўмовах ўзмоцненага рэжыму. Прысуд яшчэ можа быць абскарджаны.