«Саўбелія» зрабіла Лукашэнку маладзейшым

Друкаваны орган Адміністрацыі кіраўніка краіны зрабіў Лукашэнку шатэнам.

Падмаляванае фота было размешчанае ў нумары за 27 лістапада, першая паласа якога цалкам прысвячалася праграме кандыдата ў прэзідэнты РБ Аляксандра Лукашэнкі.

Сівізна кіраўніка Беларусі нечым не спадабалася рэдактарам «Беларусі Сегодня» і яны вырашылі ператварыць яе ў маладыя каштанавыя пасмы. Лысіна засталася некранутай.

Цікава, што колер валасоў Лукашэнкі не засмуціў рэдактараў іншага дзяржаўнага выдання — газеты «Звязда». У той самы дзень на першай паласе «Звязды» таксама была надрукаваная праграма кандыдата Лукашэнкі, з тым самым фота. Аднак у «Звяздзе» кіраўнік Беларусі выглядаў больш натуральна.