Нігерыйскія мянялы ў Беларусі падставілі суайчыннікаў

У Гомелі пры спробе збыту трохсот фальшывых долараў затрыманы тры нігерыйцы. Замежнікі прыйшлі ў аддзяленне Белінвестбанка і падалі для абмену на рублі чатыры стадоларавыя купюры. Уважлівы касір практычна адразу выявіла, што тры з іх маюць яўныя прыкметы фальшыўкі, і націснула трывожную кнопку.

Супрацоўнікі цэнтральнага аддзела "Ахова" Гомеля зрэагавалі вельмі хутка і даставілі грамадзян Нігерыі ў міліцыю. Эксперты-крыміналісты адразу ж далі заключэнне: грошы фальшывыя. Як расказаў начальнік падраздзялення АБЭЗ Дзмітрый Ражкоў, пры асабістым надглядзе было канфіскавана яшчэ 1500 долараў ЗША з яўнымі прыкметамі фальшыўкі. Прычым валюты ў грамадзян было амаль у два разы больш — толькі частка была фальшывай. Высветлілася, што ў сябе на радзіме маладыя людзі купілі частку валюты ў банку, а частку — у мясцовых нігерыйскіх мянял. Вось менавіта гэтыя грошы і аказаліся фальшывымі. Замежныя грамадзяне былі вельмі ўсхваляваны гэтай сітуацыяй. Супрацоўнікі міліцыі, як маглі, іх супакойвалі і нават не сталі затрымліваць. Зараз праводзіцца экспертыза канфіскаваных "грашовых" знакаў. Пасля яе будзе вырашацца пытанне аб завядзенні крымінальнай справы. Дарэчы, мужчынам, як здатчыкам, якія добрасумленна памыляліся, нічога не пагражае. Зразумела, акрамя страты фальшывых долараў.

Ірына АСТАШКЕВІЧ.