Буйная перамога над Францыяй

Напярэдадні алімпійскай кваліфікацыі айчынная хакейная зборная знаходзіцца ў добрай форме. Пра гэта сведчыць і ўпэўненая перамога пад дахам "Мінск-Арэны" над французамі — 4:0.

На фоне адлічэння з каманды Андрэя Касціцына, пра якое "Звязда" пісала ў мінулым нумара, перамога ў гэтай таварыскай гульні як добры піяр-ход.Так, каманда Францыі — гэта далёка не лідары сусветнага хакея. іх неабходна перамагаць і без нашых "зорак", але для стварэння добрай аўры вакол каманды вынік матча сапраўды не перашкодзіць. Наадварот, мяркую, пойдзе на карысць, павінен разняволіць хлопцаў перад адказным стартам у дацкім Военсе. "Мы толькі нядаўна сабраліся разам, правялі збор, на якім было шмат тэорыі, аднак няшмат практыкі, — зазначыў Андрэй Скабелка, галоўны трэнер нашай зборнай. — На пляцоўцы была адна каманда, члены якой змагаліся адзін за аднаго". На вачах Прэзідэнта і 14 тысяч актыўных балельшчыкаў беларусы не пакінулі ніводнага шанцу "трохкаляровым". Адметна, што французы таксама будуць удзельнічаць у алімпійскай кваліфікацыі, але ў іншай групе. У нашым квартэце F сапернікі падабраліся, на наш погляд, не горшыя — Данія, Славенія і Украіна. А таму і змаганне за пуцёўку ў Сочы будзе цяжкае. Першы матч праводзім ужо заўтра. Сапернік — зборная Славеніі. Пачатак гульні ў 18:00.

Тарас ШЧЫРЫ.