Ад Альгерда да Юр'евай горкі. Гарадскія феномены Віцебска сабралі ў "алфавіт"

У горадзе на Дзвіне стварылі каталог мясцовых феноменаў - «Віцебскі алфавіт». Кожнай з 32-х літар беларускай азбукі адпавядае пэўная гарадская адметнасць. Шукаць феномены арганізатарам праекта актыўна дапамагалі гараджане.

«Мы завяршылі асноўную частку праекта «Віцебскі алфавіт». Увосень гараджане даслалі нам амаль 250 гарадскіх феноменаў (помнікаў, аб'ектаў тапанімікі, імён знакамітых землякоў, важных падзей з гісторыі і г.д.) у парадку па літарах беларускага алфавіта. Прапановы мелі вельмі розны характар, часам на мяжы фарса. Найбольш вартыя з іх адабрала журы. У яго склад увайшлі вядомыя віцебскія гісторыкі, краяўзнаўцы, мастакі - Мікалай Півавар, Людміла Хмяльніцкая, Вольга Давідоўская, Святлана Баранкоўская, Дзяніс Юрчак і іншыя.

У выніковы каталог трапілі самыя моцныя вобразы, якія даслала найбольшая колькасць жыхароў і станоўча ацаніла журы. Часцей за ўсё выбар першых і другіх супадаў. Сярод адназначных фаварытаў - князь Альгерд, Васіль Быкаў, Віцьба, Дзвіна, віцебскія замкі, IFMC, тэатр «Лялька», Юдэль Пэн, ратуша, трамвай, УНОВІС, Марк Шагал", — распавёў TUT.BY адзін з арганізатараў праекта Раман Воранаў.

Поўны спіс феноменаў з тлумачэннямі ад спецыялістаў можна убачыць у электронным зборніку па гэтай спасылцы. Над электронным каталогам працавалі дызайнер Ігар Юхневіч, фатограф Аляксандра Гарлачова-Русалоўская.

Арганізатары спадзяюцца, што з цягам часу атрымаецца зрабіць папяровы варыянт каталога. Яго можна было б выкарыстоўваць у тырыстычнай сферы.

Прэзентацыя праекта «Віцебскі алфавіт» пройдзе заўтра, 3 снежня, у «Арт-прасторы «Талстога, 7». Пачатак а 17-й гадзіне. Уваход вольны. Тэлефон для даведак: +375 (25) 913−38−76.