Аліменты: што, дзе, калі

У мінулым месяцы ў Смаргоні мужчыну выселілі з кватэры за нявыплату аліментаў, але той адмовіўся з’язджаць і пагражаў падпаліць яе. Без міліцыі не абышлося.

Хто і ў якіх выпадках павінен выплачваць аліменты  і якія спагнанні прымяняюцца да неплацельшчыкаў? На гэтыя і іншыя пытанні “Рэгіянальнай газеты” адказвае Анжаліка Новікава, судовы выканаўца Маладзечанскага суда. 

– У якіх выпадках і каго абавязваюць плаціць аліменты?

– Да выплаты аліментаў прыцягваюцца асобы, якія не аказваюць матэрыяльнай дапамогі сваім дзецям ці бацькам. Але ж за 20 год маёй практыкі выпадак, калі маці падала заяву на сына, быў толькі адзіны. І то потым яна забрала тую заяву назад – пытанне вырашылі  палюбоўна. Звычайна жонка падае на мужа.

– Калі чалавек адмаўляецца плаціць, што яму пагражае?

– Пакаранне залежыць ад сумы запазычанасці. Гэта можа быць і канфіскацыя маёмасці, і вылічэнне грошай з заработнай платы, і нават прыцягненне да крымінальнай адказнасці, праўда, з трэцяга разу.

Гэта азначае, што спачатку ўзбуджаецца крымінальная справа, чалавека прыцягваюць да грамадскіх прац, напрыклад. Потым да выпраўленчых. Калі і пасля гэтага чалавек не выпраўляецца і працягвае ўхіляцца ад выплаты, не гасіць запазычанасці, яго адпраўляюць у месцы пазбаўлення волі.

– Калі чалавек, які мусіць выплачваць аліменты, з’ехаў за мяжу і не вяртаецца…

– Тады на яго ў судовым парадку падаюць у вышук і спаганяюць гэтыя грошы. З многімі краінамі заключаны дагавор для такіх мэт. А калі краіна, у якую ён з’ехаў, не ўваходзіць у гэты спіс, тады ўсё! Яго ніхто не будзе шукаць.

– Які працэнт з зарплаты вылічваюць на карысць аліментаў?

– 25% на адно дзіця, 33%  – на двое і 50% – на трое.

– Ці здараецца, што чалавек спецыяльна заніжае заробкі, каб менш плаціць?

– Здараецца, але ж гэта ўжо справа не па нашай частцы. У любым выпадку, існуе самы малы парог – 50% ад пражытковага мінімуму.

– Да якога ўзросту выплачваюць аліменты?

– Дзецям да 18-ці год, а бацькам  да канца жыцця. Часта людзі блытаюць аліменты з дзяржаўнай дапамогай сіротам і інвалідам. Такая дапамога ажыццяўляецца дзяржавай да 23 гадоў, калі чалавек не працуе.

– Такая сітуацыя: жанчына развялася з мужам. Дзеці засталіся з ёю. Гадоў пятнаццаць яна не падавала на яго ў суд на аліменты, потым вырашыла падаць. Ці прымусіць суд гэтага мужа выплачваць грошы за ўсе 15 год?

– Выплаціць толькі за апошнія тры гады, і то калі яна дакажа, што і да гэтага часу спрабавала прыцягнуць яго да выплаты.

– Рэдкая з’ява, калі бацькі могуць падаваць на дзяцей у суд дзеля выплаты аліментаў. У якіх выпадках такое магчыма?

– Калі гэтыя бацькі недзеяздольныя (інваліды, пенсіянеры), а таксама калі  яны  атрымліваюць малую пенсію. Гэта вызначаецца рашэннем суда і параўноўваецца з даходамі дзіцяці.

– Ці можа чалавек, якога абавязалі выплачваць аліменты, выязджаць за мяжу?

– Калі ў яго няма ніякай запазычанасці і ён рэгулярна (кожны месяц) выплачвае грошы, то перашкод няма.
Выплаціў аліменты – ездзі спакойна.

У Расіі Дзярждума разглядае папраўкі ў федэральны закон, якія дазваляюць часова пазбаўляць правоў кіроўцу, неплацельшчыка аліментаў. Такая практыка, кажуць, ужо даўно існуе ў ЗША, Канадзе, Польшчы, Вялікабрытаніі і некаторых іншых краінах свету.

Дар’я СПЕВАК, школа маладога журналіста.

Фота mormonstories.org