Золатавалютныя рэзервы Беларусi на канец года павiнны скласцi $8,2 млрд

Аб гэтым заявіла ўчора кіраўнік Нацбанка Надзея Ермакова на адкрыцці новага цэнтральнага офіса ААТ "Банк БелЗЭБ", перадае БЕЛТА.

Надзея Ермакова падкрэсліла, што паступленне валюты і яе расходы знаходзяцца пад асаблівым кантролем урада Беларусі і Нацыянальнага банка. Яна адзначыла, што пошук дадатковых крыніц для папаўнення золатавалютных рэзерваў з'яўляецца адной з асноўных задач для Беларусі. На гэта павінны быць накіраваны намаганні не толькі ўрада і Нацыянальнага банка, але і тых, хто працуе на вытворчасці, у фінансавай сістэме, у сацыяльнай сферы.

Золатавалютныя рэзервы Беларусі на канец года павінны скласці $8,2 млрд, падкрэсліла кіраўнік Нацыянальнага банка. "Так павінна быць для таго, каб мы маглі вытрымаць двухмесячны імпарт", — растлумачыла Надзея Ермакова. Яна нагадала, што ў гэтым годзе імпарт значна зменшыўся ў параўнанні з мінулым годам.

На 1 жніўня золатавалютныя рэзервы Беларусі ў вызначэнні ССРД МВФ склалі, паводле папярэдніх звестак, $8230,2 млн.

Надзея Ермакова адзначыла, што, нягледзячы на запаволенне тэмпаў па зніжэнні стаўкі рэфінансавання з 2 працэнтных пунктаў да 0,5 працэнтнага пункта, прагноз па зніжэнні стаўкі рэфінансавання да канца года да 20-23 працэнтаў пакуль застаецца актуальным. "Мы на гэты прагноз выходзім, калі не здарыцца штосьці надзвычайнае. Пытанне толькі, у якім месяцы яго ўдасца выканаць", — сказала яна.

Прымаючы рашэнне па зніжэнні стаўкі рэфінансавання, Нацыянальны банк арыентуецца на тэмпы інфляцыі. Такім чынам, не выключыла яна, пры адпаведных умовах тэмпы зніжэння стаўкі рэфінансавання могуць паскорыцца. Разам з тым, калі ўзнікне такая неабходнасць, стаўка рэфінансавання можа быць у нейкі перыяд і павышана. Стаўка рэфінансавання — гэта інструмент, накіраваны на стабілізацыю курсу, а таксама попыту насельніцтва на крэдыты і зберажэнні. "Пакуль неабходнасці ў павышэнні стаўкі рэфінансавання няма", — падкрэсліла Надзея Ермакова.