ВУП Беларусі за студзень—жнівень узрос на 9,1 працэнта да Br155,1 трлн

Аб'ём валавога ўнутранага прадукту Беларусі ў студзені—жніўні гэтага года ўзрос на 9,1 працэнта ў параўнанні з узроўнем аналагічнага перыяду мінулага года да Br155,1 трлн, паведаміла БЕЛТА прэс-сакратар Нацыянальнага статыстычнага камітэта Алена Кандраценка.

Згодна з прагнозам сацыяльна-эканамічнага развіцця на 2011 год, тэмп росту ВУП павінен скласці 109-110 працэнтаў да адпаведнага ўзроўню 2010 года.

Вытворчасць прамысловай прадукцыі за студзень—жнівень гэтага года ўзрасла на 11 працэнтаў і склала Br174,6 трлн (гадавы прагноз росту — на 9-9,5 працэнта). Удзельная вага адгружанай інавацыйнай прадукцыі ў агульным аб'ёме адгружанай прадукцыі склала 16,9 працэнта пры гадавым прагнозным значэнні гэтага паказчыка — 12-13 працэнтаў.

Аб'ём інвестыцый у асноўны капітал у студзені—жніўні гэтага года склаў 118,9 працэнта да аналагічнага ўзроўню мінулага года пры гадавым прагнозе 116-117 працэнтаў.