"Прастытуткі Мінска" карыстальнікаў інтэрнэту цікавяць больш, чым "вакансіі ў Мінску"?
Ну і ну!
Кампанія Яндэкс правяла вынікі пошукавых запытаў са словам "Мінск" за вясну 2011 года: прынамсі, карыстальнікі з Мінска пішуць назву свайго горада ў 4,7% пошукавых запытаў — гэта больш за 40 тысяч запытаў са словам "Мінск" кожны дзень.
На першым месцы па папулярнасці знаходзіцца запыт "надвор'е ў Мінску", на другім — "праца ў Мінску", на трэцім — "карта Мінска". Таксама мінчане спрабуюць праз Яндэкс адшукаць сайт мінскага аўтарынка "Аўтамалінаўка", расклад аўтобусаў, курсы валют і гэтак далей. Цікава, што на восьмым месцы па папулярнасці ідзе запыт "прастытуткі Мінска", які абыходзіць такія запыты, як "вакансіі ў Мінску" і "купіць аўто ў Мінску".
Дарэчы, запыты з назвай свайго горада плюс словы "надвор'е", "праца" і "карта" з'яўляюцца тыповымі для ўсіх гарадоў, адзначана ў даследаванні аналітычнай групы дэпартамента маркетынгу кампаніі Яндэкс. Амаль паўсюль у дваццатку самых папулярных запытаў трапляюць і газеты з аб'явамі, кінатэатры, нерухомасць, спартыўныя клубы, камп'ютарныя крамы, гандлёва-забаўляльныя цэнтры, аўтамабільныя арганізацыі і буйныя СМІ. Але пры гэтым кожны горад мае і свае спецыфічныя запыты: напрыклад, жыхары Пермі часта шукаюць у Яндэксе "да ўрача Перм", бо там у горадзе працуе эксперыментальны праект "Электронная рэгістратура". Што тычыцца Мінска, то тут таксама ёсць запыты, якія не прысутнічаюць у ТОП-20 іншых гарадоў — гэта расклад аўтобусаў, курсы валют, сайт аўтарынка "Аўтамалінаўка", газета "Аўтабізнэс", інфармацыя пра набыццё аўтамабіляў, мабільных тэлефонаў і пра арэнду жылля.
Павел БЕРАСНЕЎ.