Станцыя метро «Плошча Леніна» не стане «Плошчай Незалежнасці»?

Перайменаванне станцыі метро «Плошча Леніна» у «Плошчу Незалежнасці» будзе чарговы раз разглядацца ў Мінгарвыканкаме ў верасні. Аб гэтым паведаміла начальнік аддзела культурна-асветнай працы Упраўлення культуры Мінгарвыканкама Вольга Лукашук.

15 сакавіка Камiсiя па найменаваннi i перайменаваннi вуліц пры Мiнгарвыканкаме (у яе склад уваходзяць гарадскія чыноўнікі, дэпутаты Мінгарсавету, галоўны мастак і прадстаўнікі грамадскасці) прыняла рашэнне аб перайменаванні шэрагу сталічных артэрый. Гэтак, вуліца Герцэна павінна была стаць Бернардынскай, Дзімітрава — Пятніцкай, Рэвалюцыйная — Койданаўскай, Вызвалення — Уваскрасенскай, Камунальная ўзбярэжная — Траецкай узбярэжнай. Апроч таго, станцыя метро «Плошча Леніна» мусіла атрымаць назву «Плошча Незалежнасці», якую ўжо насіла з 1992 па 2003 год.

Паводле закону, рашэнне Камісіі было надрукавана ў прэсе, пасля чаго цягам двух тыдняў кожны ахвочы мог дасылаць свае заўвагі і прапановы. З улікам грамадскай думкі дэпутаты Мінгарсавета 25-га склікання мелі прыняць канчатковае рашэнне яшчэ напрыканцы сакавіка — пачатку красавіка. Аднак не паспелі зрабіць гэтага да сканчэння чатырохгадовага тэрміну паўнамоцтваў.

Па словах Вольгі Лукашук, да іх прыйшло шмат водгукаў ад мінчукоў — як станоўчых, гэтак і адмоўных.

«Сітуацыя з перайменаваннем «Плошчы Леніна» неадназначная. Ветэранскія арганізацыі супраць. Таму Камiсiя па найменаваннi i перайменаваннi вуліц пры Мінгарвыканкаме вернецца да разгляду гэтага пытання ў верасні», — адзначыла чыноўнік.

Калі ж Камісія ўсё ж ухваліць перайменаванне «Леніна» у «Незалежнасці», матэрыялы будуць перададзеныя на разгляд Мінгарсавета 26-га склікання.

Праўда, адзін з сяброў сталічнай Камiсiі па перайменаваннi, які прасіў не называць свайго імя, паведаміў, што мае вялікія сумневы адносна станоўчага вырашэння гэтага пытання. «Надта ўжо складаная і канфліктная сітуацыя», — сказаў эксперт.