АБЗАЦ

ДАІ ў гэтыя выхадныя будзе асаблiва строга ставiцца да п'яных вадзiцеляў. Спецпадраздзяленне УДАI МУС "Страла" практычна ў поўным складзе выязджае ў камандзiроўкi ў розныя рэгiёны Беларусi. Увага будзе звернутая таксама на вадзiцеляў, якiя кiруюць аўтамабiлямi без адпаведных пасведчанняў. Прыцягнуць да строгай адказнасцi i тых, хто выязджае на сустрэчную паласу з парушэннем ПДР.

Супрацоўнiкi РУУС Цэнтральнага раёна Мiнска канфiскавалi ў камерсанта больш 460 запчастак, на якiя адсутнiчалi дакументы. Агульная сума вузлоў i механiзмаў хадавой часткi аўтамабiляў склала больш за Br100 млн. Аператыўнiкi не выключаюць, што сярод канфiскаваных дэталяў ёсць i крадзеныя. Вядуцца праверкi.

Мунiцыпалiтэт нямецкага гарадка Нiдэрцымерн у Цюрынгii пачаў распродаж ямiн на дарогах. Атрыманыя сродкi мяркуецца накiраваць на рамонт дарожнага палатна, якое сур'ёзна пацярпела падчас суровай снежнай зiмы. У рамках акцыi, якую можна перакласцi як "Зацыруй гэта" (Teer muss her), кожны ахвотны можа зайсцi на афiцыйны сайт горада i выбраць сабе выбоiну цi яму i за 50 еўра набыць гэты ўчастак. На продаж выстаўлена каля 40 пашкоджаных участкаў дарогi, большая частка з якiх ужо распрададзеная. Падчас рамонту дарогi побач з "зацыраванымi" выбоiнамi ў асфальт будуць уманцiраваныя невялiкiя таблiчкi з iмёнамi ўладальнiкаў. Сёлетняй зiмой у Германii было сур'ёзна пашкоджана каля 40 % дарог. Толькi мясцовым уладам на правядзенне тэрмiновага рамонту спатрэбiцца больш за 3 млрд еўра.

У графстве Эсэкс (Вялiкабрытанiя) адбыўся незвычайны выпадак: некалькi курыц далi рашучы адпор лiсе, якая залезла ў куратнiк, каб пажывiцца свежым мясам. Як расказала гаспадыня фермы, маленькi столiк, на якiм звычайна сядзяць хахлаткi, быў перавернуты i ляжаў ля галавы лiсiцы. Падобна на тое, што куры штурханулi стол, збiлi лiсу з ног i задзяўблi да смерцi. Лiсiца была, па словах гаспадынi, яшчэ маладой i нявопытнай, не разлiчвала на такую агрэсiю з боку тых, кiм хацела павячэраць. "Гэта было не лiсяня, але дастаткова маладая жывёлiна, а Дзюд i Iзi ў мяне буйныя птушкi", — адзначыла жанчына.