Аляксандр Лукашэнка патрабуе забяспечыць строгі парадак і выкананне заканадаўства ў сферы палявання

Прэзідэнт Беларусі ўчора правёў рабочую паездку з міністрам прыродных рэсурсаў і аховы навакольнага асяроддзя Уладзімірам Цалко, паведамілі БЕЛТА ў прэс-службе беларускага лідара.

Кіраўнік дзяржавы растлумачыў, што запрасіў міністра для таго, каб з першых вуснаў пачуць заключэнне па законапраекце "Аб унясенні дапаўненняў і змяненняў у некаторыя законы Рэспублікі Беларусь па пытаннях аховы навакольнага асяроддзя і прыродакарыстання", які прыняты парламентам. Гэтым дакументам уносяцца дапаўненні і змяненні ў законы "Аб ахове навакольнага асяроддзя", "Аб раслінным свеце" і "Аб жывёльным свеце".

Аляксандр Лукашэнка падкрэсліў, што ўдзяляе гэтай тэме вялікую ўвагу. "Вы ведаеце пра мае адносіны да навакольнага асяроддзя, прыроды. Я аб гэтым вымушаны быў нават гаварыць у кароткім навагоднім звароце да беларускага народа. Гэта вечная каштоўнасць, дадзеная нам зверху, — адзначыў Прэзідэнт. — Але мяне апошнім часам насцярожваюць некаторыя нядобрыя тэндэнцыі ў гэтых адносінах, пачынаючы ад нашых паляўнічых, асабліва пачынаюць засвечвацца высокапастаўленыя службовыя асобы ў гэтым, мякка кажучы, "малазаконным" паляванні, калі плацяць непасрэдна егерам і іншае, забываюць аб тым, што ў нас устаноўлены жорсткі ў гэтых адносінах парадак. Але гэта не толькі прэтэнзіі да вас, гэта, перш за ўсё, прэтэнзіі да Інспекцыі (Дзяржінспекцыя аховы жывёльнага і расліннага свету пры Прэзідэнце Беларусі)".

"Я хачу, каб усе ведалі, што гэта сітуацыя ў нас пад кантролем. Калі ласка, ездзіце на паляванне, у нас сёння дастаткова звяроў, нават некаторыя скардзяцца, што залішняя колькасць. Але павінен быць жорсткі парадак", — сказаў кіраўнік дзяржавы.

Аляксандр Лукашэнка таксама выказаў занепакоенасць тым, што ў Беларусі з'явілася шмат розных паляўнічых гаспадарак, да работы якіх іншым разам узнікае нямала пытанняў. "З'явілася вельмі шмат паляўнічых гаспадарак, у тым ліку прыватных, і ўгоддзяў, якія належаць калгасам, саўгасам і прадпрыемствам, і там у нас праблем значна больш, чым у традыцыйных паляўнічых гаспадарках і ўгоддзях", — адзначыў Прэзідэнт.

У сувязі з гэтым кіраўнік дзяржавы пацікавіўся, ці вырашаюцца змяненнямі ў законе існуючыя ў гэтай сферы праблемы і ці не абыходзяцца яны бокам.

Паводле слоў Уладзіміра Цалко, законапраект быў распрацаваны з улікам прынятых апошнім часам нарматыўна-прававых дакументаў, рэгулюючых гэту сферу. Акрамя таго, заканадаўства прыводзіцца ў адпаведнасць з міжнародным правам у галіне аховы навакольнага асяроддзя, жывёльнага і расліннага свету і тымі абавязацельствамі, якія Беларусь узяла на сябе, падпісаўшы міжнародныя дагаворы.

Прэзідэнта ў першую чаргу цікавіла, ці не будзе гэтымі змяненнямі аслаблена ахова жывёльнага і расліннага свету, што ад гэтага атрымаюць жыхары Беларусі. Міністр запэўніў, што прыродаахоўнае заканадаўства ў гэтым плане нічога не страціць, але яно стане прасцейшым у прымяненні, спрашчаюцца некаторыя нормы, выключаюцца асобныя артыкулы, у якіх сёння ўжо няма неабходнасці.

Па выніках рабочай сустрэчы Уладзімір Цалко паведаміў, што кіраўнік дзяржавы падпісаў названы Закон.

Што датычыцца рэгулявання палявання і рыбалоўства, па гэтым пытанні падрыхтаваны асобны праект указа, які цяпер знаходзіцца на разглядзе ў Адміністрацыі Прэзідэнта. У ім адлюстраваны раней дадзеныя кіраўніком дзяржавы даручэнні.