Камітэт дзяржбяспекі як асноўная спецслужба краіны павінен адпавядаць сучасным патрабаванням
Аб гэтым учора заявіў Прэзідэнт Беларусі Аляксандр Лукашэнка, прадстаўляючы старшыню КДБ Валерыя Вакульчыка кіруючаму складу органаў дзяржбяспекі, перадае карэспандэнт БЕЛТА.
Прэзідэнт адзначыў, што Валерый Вакульчык з'яўляецца выхадцам з радоў супрацоўнікаў органаў дзяржбяспекі, стаяў ля вытокаў фарміравання і станаўлення Аператыўна-аналітычнага цэнтра пры Прэзідэнце Рэспублікі Беларусь. Пры ягоным актыўным удзеле ствараўся і працягвае стварацца новы дзяржаўны орган — Следчы камітэт. "Сёння абедзве структуры працуюць эфектыўна. І заслуга ў гэтым, вядома, і Валерыя Паўлавіча. Яго арганізатарскія здольнасці і якасці кіраўніка-дзяржаўніка выявіліся ў канкрэтных справах. Галоўнымі прынцыпамі яго работы з'яўляюцца аб'ектыўнасць, кампетэнтнасць і адданасць нашай дзяржаве. Ведаю, што ён не прымае бяздзейнасці і словаблудства. Менавіта гэта прадвызначыла рашэнне аб прызначэнні яго кіраўніком асноўнай спецслужбы краіны", — сказаў Аляксандр Лукашэнка.
"Вельмі б хацеў спадзявацца, што гэты новы чалавек разам з вамі зробіць тую спецслужбу, якая павінна адказваць сучасным патрабаванням", — падкрэсліў беларускі лідар.
На думку кіраўніка дзяржавы, у КДБ, як і ў любым іншым калектыве, ёсць людзі, якія "хацелі б больш вольна сябе адчуваць, не хадзіць на працу, забываючы пра тое, што на плячах пагоны". "Вось тым трэба шукаць іншую працу. І вы не бойцеся, што ад вас кудысьці пойдуць людзі. Хай сыходзяць. Мы гатовыя, і нямала робім сёння, каб стварыць для чэкістаў самыя спрыяльныя ўмовы працы", — сказаў Аляксандр Лукашэнка.
"Таму што я як Прэзідэнт бачу, што адбываецца вакол нашай краіны і ўнутры і якіх мне варта намаганняў, каб стрымаць краіну, каб яе на кавалкі не парэзалі і не расцягнулі, — працягнуў Аляксандр Лукашэнка. — Вы гэта таксама бачыце. Але бачыць — гэта адно, трэба прадпрымаць максімум намаганняў, каб стварыць цэласнасць, недатыкальнасць і бяспеку нашай краіны. Вось для такіх супрацоўнікаў мы гатовыя стварыць любыя ўмовы. Хай іх будзе не 12 тыс., не 10 тыс. і нават не 6 тыс. чалавек. Хай іх застанецца 3 тысячы, але гэта застануцца адданыя дзяржаве людзі. З такімі Вакульчык будзе працаваць. Усе астатнія куды хочуць хай сыходзяць".
Кіраўнік дзяржавы падкрэсліў, што асноўным крытэрыем ацэнкі кіраўніка з'яўляецца здольнасць згуртаваць калектыў і стварыць абстаноўку рэзультатыўна-напружанай, але творчай работы.
Асноўнай прычынай адстаўкі Вадзіма Зайцава з пасады старшыні КДБ стала нездаровая маральна-псіхалагічная абстаноўка, якая склалася ў асобных падраздзяленнях Камітэта дзяржбяспекі, заявіў Аляксандр Лукашэнка. Паводле слоў Прэзідэнта, у аснову прычын адстаўкі ранейшага кіраўніка КДБ ляглі праблемы ў рабоце з асабовым складам, якія былі абазначаны на нарадзе 9 лістапада ў кіраўніка дзяржавы. "У першую чаргу — гэта нездаровая маральна-псіхалагічная абстаноўка, якая склалася ў асобных падраздзяленнях КДБ. Яна выкліканая недахопамі ў арганізацыі як кадравай, так і ідэалагічнай работы, а таксама перакос пры забеспячэнні ўласнай бяспекі", — заявіў Аляксандр Лукашэнка.
Як адзначыў кіраўнік дзяржавы, прынятыя рашэнні, перш за ўсё, звязаныя з настроем і меркаваннем сярэдняга і ніжэйшага звяна супрацоўнікаў КДБ. "Я іх голас пачуў. Магу сказаць, ваш голас пачуў. Але па-мужчынску хачу вас папярэдзіць, што да вас прыйшоў кіраўнік "Зайцаў у квадраце". Гэта не той добры хлопец, якога, можа быць, хтосьці тут чакаў, — падкрэсліў Прэзідэнт. — Гэта "Зайцаў у квадраце", але без лішніх заносаў, без галавацяпства, чалавек, нацэлены на прафесіяналізм, адзін з нямногіх, хто жалезабетонна ведае, чаго хоча Прэзідэнт ад КДБ".
Аляксандр Лукашэнка нагадаў, што ў пачатку бягучага года на калегіі КДБ ужо абмяркоўваліся праблемы, якія ёсць у ведамстве. "Тады мною даваліся ўказанні перагледзець падыходы ў рабоце з асабовым складам. Аднак, да майго жалю, належныя высновы зроблены не былі. Больш за тое, некаторыя праблемы яшчэ больш абвастрыліся, сталі набываць негатыўны грамадскі рэзананс", — адзначыў кіраўнік дзяржавы. Пры гэтым ён згадаў пра сыход з жыцця падпалкоўніка Казака. "Натуральна я быў вымушаны звярнуць увагу на такую сітуацыю і прыняць сур'ёзныя меры. Спачатку быў адпраўлены ў адстаўку начальнік упраўлення ўласнай бяспекі КДБ, а следам і старшыня", — падкрэсліў Прэзідэнт.
"Тым не менш, яшчэ раз хачу падкрэсліць, калі хтосьці думае, што Зайцаў — гэта дрэнны і нягодны для КДБ чалавек... Можа, ён і нягодны, але не таму, што ён дрэнна служыў. Ён па-свойму разумеў свае задачы. Больш за тое, ён разам з вамі вырашаў гэтыя задачы, і на асобных напрамках вельмі эфектыўна", — сказаў Аляксандр Лукашэнка.
У прыватнасці, па словах кіраўніка дзяржавы, работа органаў дзяржбяспекі набыла больш сістэмны і нацэлены на прадметнае рашэнне задач характар. Павысіўся ўзровень інфармацыйна-аналітычнай дзейнасці, контрразведвальніцкага забеспячэння дзяржаўных органаў. Прыняты меры па актывізацыі інфармацыйнага проціборства з нядобразычліўцамі і дэструктыўнымі сіламі, па ўмацаванні выканальніцкай і воінскай дысцыпліны сярод супрацоўнікаў КДБ. "Але была маса недахопаў, якія непрымальныя для КДБ", — заявіў Прэзідэнт. Кіраўнік дзяржавы таксама дадаў: "Зайцаў без працы не застанецца. І ніхто яго з краіны не збіраецца выпіхаць".
"Аднак, як я і казаў на нарадзе, пра гэта я казаў Зайцаву, галоўная каштоўнасць у нас — гэта людзі. А ў КДБ гэта, безумоўна, салдаты, афіцэры, генералы — воінскі калектыў, але гэта таксама людзі, і да іх трэба ставіцца па-чалавечы, — заўважыў Аляксандр Лукашэнка. — Тым больш, гэта людзі з асаблівымі якасцямі, адораныя, з мазгамі. А з разумнымі людзьмі трэба ўмець сябе паводзіць, у тым ліку і кіраўніка. І таму асноўны крытэрый ацэнкі кіраўніка — здольнасць згуртаваць калектыў, стварыць абстаноўку рэзультатыўна-напружанай, але творчай работы".
"Запомніце, у нас нямала праціўнікаў і ворагаў. З імі трэба бязлітасна змагацца. Але трэба давяраць тым людзям, якія вядуць гэтую барацьбу, і не трэба апрыёры ў кожным бачыць дрэннага чалавека. Для чэкісцкай арганізацыі гэта непрымальна", — рэзюмаваў Прэзідэнт.