ЗША падтрымліваюць намаганні Беларусі па больш хуткай рэалізацыі праекта будаўніцтва першай АЭС грамадзянскага прызначэння

ЗША падтрымліваюць намаганні Беларусі па больш хуткай рэалізацыі праекта будаўніцтва першай АЭС грамадзянскага прызначэння. Аб гэтым гаворыцца ў сумеснай заяве ЗША і Беларусі, прынятай па выніках сустрэчы дзяржсакратара ЗША Хілары Клінтан і міністра замежных спраў Беларусі Сяргея Мартынава ў рамках саміту АБСЕ ў Астане, перадае карэспандэнт БЕЛТА.

"Міністр замежных спраў Беларусі і дзяржсакратар ЗША абавязаліся ўмацоўваць глабальнае супрацоўніцтва ў сферы мірнага выкарыстання ядзернай энергіі ў адпаведнасці з міжнароднымі стандартамі і іншымі дадатковымі двухбаковымі дамоўленасцямі, якія могуць быць заключаны паміж Рэспублікай Беларусь і ЗША", — гаворыцца ў сумеснай заяве.

Там таксама сказана, што "Беларусь аб'явіла аб намеры дыверсіфікаваць сваё энергетычнае забеспячэнне шляхам будаўніцтва сваёй першай АЭС грамадзянскага прызначэння". "ЗША падтрымліваюць гэту дзейнасць, якая ўключае ў сябе спаборны працэс праектавання і будаўніцтва надзейнай і бяспечнай станцыі, што дзейнічае ў адпаведнасці з гарантыямі МАГАТЭ. ЗША падтрымліваюць намаганні Беларусі па больш хуткай рэалізацыі гэтага камерцыйнага праекта", — адзначаецца ў сумеснай заяве.

Дзяржсакратар ЗША і кіраўнік МЗС Беларусі пацвердзілі прыхільнасць дзвюх краін да справы ядзернай бяспекі і ядзернага нераспаўсюджвання, а таксама сваё ўяўленне аб свеце без ядзернай зброі і абавязаліся працаваць разам для прадухілення ядзернага распаўсюджвання. Хілары Клінтан прызнала гістарычнае рашэнне Беларусі аб адмове ад сваёй ядзернай зброі, прынятае ў 1994 годзе, у якасці значнага ўкладу ў справу ядзернага раззбраення і зноў пацвердзіла гарантыі бяспекі Беларусі, зафіксаваныя ў Будапешцкім мемарандуме ад 5 снежня 1994 года.

Міністр замежных спраў Беларусі аб'явіў аб тым, што Беларусь прыняла рашэнне аб ліквідацыі ўсіх сваіх запасаў высокаабагачанага ўрану і мае намер ажыццявіць гэта да наступнага саміту па ядзернай бяспецы ў 2012 годзе. Злучаныя Штаты маюць намер прадаставіць тэхнічную і фінансавую дапамогу для больш хуткага ажыццяўлення гэтых мер", — гаворыцца ў сумеснай заяве.

Дзяржсакратар ЗША станоўча адзначыла рашэнне Беларусі як знак прагрэсу ў дзейнасці па ўзмацненні ядзернай бяспекі і ядзернага нераспаўсюджвання і вітала намер Рэспублікі Карэя запрасіць Беларусь для ўдзелу ў саміце па ядзернай бяспецы ў 2012 годзе. "Прыняўшы гэта рашэнне, Беларусь далучаецца да ЗША ў міжнародных намаганнях па пераводу ядзерных установак на выкарыстанне нізкаабагачанага ўранавага паліва, што ў ХХІ стагоддзі становіцца сусветным стандартам. Абодва бакі абавязаліся прадаўжаць сумесную работу ў сферы забеспячэння ядзернай бяспекі, уключаючы павышэнне ўзроўню бяспекі ў Аб'яднаным інстытуце энергетычных і ядзерных даследаванняў у Беларусі", — адзначаецца ў сумеснай заяве па выніках сустрэчы.