Ладуцька з в.а. стаў старшынём Мінскага гарвыканкама

1990-я і пачатак 2000-х Ладуцька адпрацаваў у будаўніцтве Мінска.

Мікалай Ладуцька 25 чэрвеня ўказам прэзідэнта прызначаны старшынёй Мінскага гарвыканкама. Пра гэта паведамілі ў прэс-службе кіраўніка дзяржавы.

З 10 чэрвеня 2009 года Ладуцька выконваў абавязкі старшыні — першага намесніка старшыні Мінскага гарадскога выканаўчага камітэта. На пасадзе кіраўніка Мінгарвыканкама Ладуцька змяніў Міхаіла Паўлава, які 6 чэрвеня 2010 года памёр пасля цяжкай хваробы.

Мікалай Ладуцька нарадзіўся ў 1959 годзе ў Мінску. У 1981 годзе скончыў Беларускі політэхнічны інстытут, у 2007 годзе — Акадэмію пры прэзідэнце. Працоўную дзейнасць пачаў у 1981 годзе майстрам будаўнічага ўпраўлення № 256 Мінскага вытворчага аб’яднання індустрыяльнага домабудавання (МВАІД). У 1982–1985 гадах — намеснік сакратара камітэта камсамола, сакратар камітэта камсамола МВАІД. У 1985–1987 гадах — першы сакратар Фрунзенскага РК ЛКСМБ Мінска. У 1987–1988 гадах — намеснік загадчыка аддзела камсамольскіх арганізацый ЦК ЛКСМБ Мінска. У 1988–1990 гадах — інструктар арганізацыйнага аддзела Фрунзенскага РК КПБ Мінска. З 1990 года — начальнік вытворча-тэхнічнага аддзела будаўнічага ўпраўлення № 256 МВАІД.

У 1997–2001 гадах — начальнік аддзела інжынернай падрыхтоўкі, начальнік вытворчага аддзела па будаўніцтве МАПІД «Мінскжылбуд». У 2001–2003 гадах — начальнік будаўнічага ўпраўлення № 101 ААТ «МАПІД».

У 2003–2006 гадах — дырэктар камунальнага унітарнага прадпрыемства «УКБ Мінгарвыканкама». У 2006–2007 гадах — кіраўнік адміністрацыі Фрунзенскага раёна Мінска, член Мінскага гарадскога выканаўчага камітэта. У 2007–2009 гадах — намеснік старшыні Мінскага гарвыканкама.