Віцяблянін збіраўся скочыць з дзявятага паверха (фота)

Зранку 28 жніўня ў Віцебску 24-гадовы хлопец спрабаваў скочыць з гаўбца дзявятага паверха шматпавярхоўкі ў раёне Білева, паведамляе прэс-служба МУС у сваім Telegram-канале.

Міліцыя атрымала паведамленне на спецлінію 102. Адразу ж на месца выехалі супрацоўнікі Першамайскага РАУС Віцебска, АМАП, МНС.

Сваячка маладога чалавека заявіла міліцыянтам, што не ведае прычыну, па якой ён наважыўся на такі крок.

Мужчына нікога да сябе не падпускаў і пагражаў саскочыць, калі пабачыць міліцыянтаў. Каб паўплываць на яго, праваахоўнікі прывезлі ягонага сябра.

Урэшце віцябляніна ўдалося выклікаць з гаўбца. Яго перадалі медыкам. 

Прычыны і матывы яго ўчынку высвятляюцца.