Брастаўчанін уцёк з лякарні і скраў акардэон

56-гадовы жыхар Камянецкага раёна прыехаў на лецішча ў вёсцы Вярховічы і пабачыў, што замок сарваны, а з хаты зніклі рэчы, піша прэс-служба УУС Брэсцкага аблвыканкама. 

З хаты зніклі посуд, прадукты харчавання, пасцельная бялізна, музычны цэнтр, акардэон і парадны мундзір яго бацькі.

Міліцыянты высветлілі, што крадзеж учыніў непрацуючы 43-гадовы брастаўчанін, які знаходзіцца на прымусовым лячэнні ў гэтай жа вёсцы. Мужчына ўцёк з лякарні і абакраў чужую хату. Скрадзеныя рэчы ён аддаў на часовае захоўванне аднавяскоўцу пацярпелага. 

Праваахоўнікі вярнулі рэчы гаспадару. Мужчыну змясцілі ў ізалятар часовага ўтрыманны. 

Па факце крадзяжу Следчы камітэт пачаў крымінальную справу.