Сакрэтамі, як спазнаць душу народа, супыніць час і ўкласці прыгажосць у кожны твор рук чалавечых, падзяліліся ўдзельнікі раённага семінара-практыкума “Асаблівасці адраджэння і развіцця традыцыйных беларускіх рамёстваў”. Сёлета знакавая падзея прайшла ў Ярэміцкім Доме культуры.
Сустракала ўдзельнікаў семінара багатая на дзівы і цікавыя творчыя знаходкі выстава народных майстроў Карэліцкага раёна “Гонар маёй зямлі”, прысвечаная Году малой радзімы і 75-годдзю ўтварэння Гродзенскай вобласці. Не абыйшлі ўвагай прысутныя і залу з галоўнымі героямі вядомага аматарскага аб’яднання “Закрытыя твары”, дзе ўсіх чакала змястоўная экскурсія яго кіраўніка Марыі Крэнь.
На адкрыцці семінара начальнік аддзела ідэалагічнай работы, культуры і па справах моладзі райвыканкама, старшыня РА ГА “Беларускі саюз жанчын” Іна Санчук падкрэсліла: “Адраджаць традыцыйныя беларускія рамёствы, прыядноўваць дзяцей і моладзь да іх вывучэння, захоўваць пераемнасць пакаленняў – надзвычай важная і адказная справа. І вялікая радасць, што на Карэліччыне да спадчыны продкаў адносяцца з вялікай любоўю і пашанай”.
Актуальнасць гэтых слоў пацвердзілі і выступленні народных майстроў і работнікаў культуры.
Вера Салдатава натхніла прысутных, распавёўшы пра мастацтва саломапляцення. Сама яна нарадзілася ў сям’і, дзе мелі шырокі інтарэс да традыцыйных рамёстваў. Яе бабуля вышывала золатам, срэбрам і жэмчугам. А сама народны майстар прайшла шлях ад стварэння невялікага саламянага каня да грандыёзнай царскай брамы. А яшчэ Вера Салдатава заахвоціла прысутных рабіць з саломы не толькі сувеніры, але і нават экалагічныя стрэхі. Адным словам – мастацтва ў масы.
Мастацкі кіраўнік Ярэміцкага Дома культуры Сяргей Шымко распавёў пра вышыўку і пазнаёміў прысутных з творамі таленавітых зямлячак: Лідзіі Кавалеўскай, Таццяны Браўко, Наталлі Хваль, Марыны Зайцавай, Васіліны Анацкай.
Жывы інтарэс выклікала выступленне кіраўніка Карэліцкага Дома рамёстваў Юліі Баярэнка па тэме “Рэканструкцыя традыцыйнага строю ў адзенні” з удзелам вышывальшчыцы Вольгі Крышань.
Народны майстар Сяргей Упіравец прызнаўся ў любові да кветак, падзяліўся сакрэтамі, як перанесці расліны на дрэва з дапамогай разьбы, і планамі рабіць рэчы у нацыянальным стылі.
Пра развіццё ганчарства ў рэгіёне і працу з падрастаючым пакаленнем распавялі Таццяна Купрас з Карэліцкага дзяржаўнага будаўнічага прафесійнага ліцэя і Аляксандра Шапяленка з Мірскай дзіцячай школы мастацтваў.
Асобна з клубнымі работнікамі дырэктар Карэліцкага раённага РЦКіНТ Наталля Гароднік абмеркавала канцэпцыю і афармленне этнавугалкоў ва ўстановах культуры.
На змену плённаму абмену думкамі прыйшлі майстар-класы па традыцыйных відах народных рамёстваў. Усе жадаючыя змаглі паспрабаваць сябе ў разьбе па дрэве, саломапляценні і ганчарстве і стварыць уласнаруч сувеніры на памяць аб семінары-практыкуме.
Марына КАЗЛОВІЧ
Фота і відэа аўтара