Адзін з навагодніх ранішнікаў адбыўся ў цэнтры карэкцыйна-развіваючага навучання і рэабілітацыі. На святочнае мерапрыемства прыйшлі намеснік старшыні Нясвіжскага райвыканкама Аляксандр Балцянкоў, намеснік начальніка ўпраўлення па адукацыі, спорце і турызме райвыканкама Святлана Шатрун, старшыня раённай арганізацыі Беларускага прафсаюза работнікаў адукацыі і навукі Людміла Крупец, дырэктар філіяла “Нясвіжскае УМГ ААТ “Газпром трансгаз Беларусь” Сяргей Лапін, прадстаўнік ААТ “АБ Беларусбанк” Ірына Захарэвіч, а таксама бацькі, педагогі выхаванцаў Цэнтра.
І дарослыя, і дзеці на імгненне апынуліся ў казачнай краіне, дзе было цікава ўсім без выключэння. Усе разам вадзілі карагоды, хваляваліся за Прынца, якога каралева мышэй Мышыльда зачаравала ў Шчаўкунчыка, удзельнічалі ў конкурсах і сюрпрызных момантах, гулялі з Дзедам Марозам і Снягуркай, расказвалі вершы, спявалі ля прыгажуні-ёлачкі.
Напрыканцы цудоўнага навагодняга прадстаўлення юныя выхаванцы прымалі перадсвяточныя віншаванні і пажаданні моцнага здароўя, добрага настрою і здзяйснення мар і жаданняў, а таксама падарункі. Сяргей Лапін падараваў пральную машыну, Людміла Крупец — пыласос, Святлана Шатрун і Аляксандр Балцянкоў уручылі развіваючыя гульні, а ад Беларусбанка дзеці атрымалі салодкія падарункі.
Вольга КАНДРУКЕВІЧ.