Нацыянальны мастацкі прапануе сустрэць Каляды у сядзібе Ваньковічаў

Супрацоўнікі сховішча твораў мастацтва прапануюць мінчанам прасякнуцца святочным настроем, даведацца пра традыцыі і абрады вялікага хрысціянскага свята ў дваранскім коле "Дома Ваньковічаў", пазнаёміцца з мастацтвам ХІХ ст.

Як расказала аўтар навукова-метадычнай канцэпцыі праграмы "Каляды ў сядзібным доме Ваньковічаў" Надзея Красуцкая, прэзентацыя праграмы адбылася летась. Сёння ў сувязі з вялікай папулярнасцю было прынята рашэнне аднавіць яе.

— Праграма адрасаваная сямейнай аўдыторыі і праводзіцца толькі ў снежні і студзені, — расказвае Н. Красуцкая. — Гэта добрая нагода сабрацца сям"ёй, а таксама запрасіць самых блізкіх і дарагіх людзей. Нашых гасцей чакае нямала сюрпрызаў.