Прынц Чарльз просіць брытанцаў не прымаць ванны

Прынц Чарльз папрасіў жыхароў Вялікабрытаніі адмовіцца ад паўнацэннага купання ў ванне, каб абараніць навакольнае асяроддзе ад забруджвання.

Як паведамляе выданне Thе Dаіl Mаіl, спадчыннік брытанскага прастола прапанаваў сваім суайчыннікам замяніць купанне ў ванне прыняццем душу. Аднак Чарльз адзначыў, што і ў душы таксама не варта затрымлівацца. На думку прынца, пяці хвілін на аднаго чалавека будзе цалкам дастаткова. Варта адзначыць, што ініцыятыва па змене рэжыму захавання асабістай гігіены стала адным з пунктаў «зялёнай» праграмы прынца Чарльза. Прынц таксама распрацаваў яшчэ 19 парадаў, якія павінны дапамагчы брытанцам стаць бліжэй да прыроды. У прыватнасці, па яго праграме, трэба больш уважліва ставіцца да рэшткаў ежы і не выкідваць іх без патрэбы, а таксама старацца шматразова выкарыстоўваць упакоўку ад прадуктаў (кансервавыя бляшанкі і пакеты). Сам прынц таксама стараецца клапаціцца пра навакольнае асяроддзе. Напрыклад, аўтамабілі Чарльза ездзяць выключна на арганічным паліве — на біядызелі з алею, а таксама на этаноле з віна. Нагадаем, што ў рамках сваёй «зялёнай» кампаніі Чарльз правядзе фестываль. Адметна, што 8 верасня для наведвання ўпершыню будуць адкрытыя сады Кларэнс-хаўс, вестмінстэрскай рэзідэнцыі членаў брытанскай каралеўскай сям’і. На фестывалі будзе прадстаўлена «экалагічная» калекцыя адзення, распрацаваная актрысай Эмай Уотсан, вядомай па ролі Герміёны Грэнджар з фільмаў пра Гары Потара. Нагадаем, што ў кастрычніку 2009 года прэзідэнт Венесуэлы Уга Чавес заклікаў суграмадзян спыніць спевы ў душы і не мыцца ў ім больш за тры хвіліны, бо краіна адчувае цяжкасці з пастаўкамі вады і электрычнасці.