Гісторыя бульдогаў і насарогаў

Намеснік міністра адукацыі Беларусі Казімір Фарыно выступіў на з’ездзе работнікаў адукацыі краін СНД у Астане з надзвычай своечасовай і карыснай ініцыятывай: стварыць адзіны падручнік па гісторыі для ўсіх краін СНД.

Безумоўна, гэта дазволіць прасачыць адзінства гістарычнага шляху Беларусі і Туркменістана, Казахстана і Украіны, Прыднястроўя і Паўднёвай Асеціі.

Новыя гістарычныя абставіны патрабуюць удакладненай тэрміналогіі. Напрыклад, мангола‑татарскае іга можна пераназваць у Першую расійска‑казахскую дамову аб калектыўнай бяспецы, а знішчэнне Іванам Грозным Полацка — у далучэнне Беларусі да згаданай вышэй дамовы.

На жаль, у найноўшай гісторыі удакладненнем тэрміналогіі не згладзіш усіх вострых кутоў. Таму пры наяўнасці спрэчных момантаў можна абвяшчаць тэндэр з удзелам зацікаўленых бакоў. Напрыклад, прыкры эпізод з пераваротам у Кыргызстане і звяржэннем законнага прэзідэнта Бакіева. Можна прапанаваць выкласці свае версіі кыргызскім гісторыкам і расійскім паліттэхнолагам. Бок, які пераможа, прафінансуе напісанне адпаведнага раздзела падручніка. Каб ні ў кога не ўзнікла сумневаў у аб’ектыўнасці, даручыць пісаць раздзел варта калектыву часопіса Адміністрацыі прэзідэнта «Беларуская думка». Як, зрэшты, гэтым надзейным спецыялістам можна даручыць пісаць усю кнігу.

Таксама ў межах праекта неабходна стварыць двухбаковыя пагаджальныя камісіі па спрэчных пытаннях беларуска‑абхазскай, беларуска‑узбекскай і г.д. гісторый. Фінансаваць іх можна з бюджэту саюзнай дзяржавы. Спатрэбіцца не менш за дзесяць выязных пасяджэнняў кожнай з такіх камісій. Узначаліць іх мог бы паважаны ва ўсім СНД пісьменнік і сенатар Мікалай Чаргінец.

А ў перспектыве чаму б не стварыць падручнікі па гісторыі дзяржаў‑удзельніц АДКБ і Мытнага саюза?