На пажары на Вілейшчыне выратаваліся дзед з унучкай

Каля дзвюх гадзін ночы 17 чэрвеня ў цэнтр аператыўнага кіравання райддзела па надзвычайных сітуацыях паступіла паведамленне аб загаранні дома пад лецішча ў вёсцы Навасёлкі Хаценчыцкага сельсавета.

На выклік накіраваліся пяць аўтацыстэрн і машына хуткай дапамогі. Па прыбыцці на месца здарэння выратавальнікі-пажарныя ўбачылі, што драўлянае лецішча гарыць адкрытым полымем. Людзей у доме ўжо не было. У выніку пажару агнём знішчаны дах па ўсёй плошчы будынка, дом выгараў знутры.

У доме начавалі 72-гадовы мужчына (бацька гаспадара) і яго 6-гадовая ўнучка. Мужчына патлумачыў, што прачнуўся ноччу ад трэску шыферу. Калі адчыніў дзверы, на яго шуганула полымя. Дзед і ўнучка вылезлі праз акно. Мужчына атрымаў тэрмічныя апёкі галавы і кісцей рук, паведаміў інспектар Дзяржпажнагляду Вілейскага райддзела па надзвычайных сітуацыях Андрэй Балаш.

Аддзел інфармацыі.

Фота mchs.gov.by