МНС назвала папярэднюю прычыну выбуху ў Пінску

Прэс-служба МНС Беларусі раніцай 26 кастрычніка распаўсюдзіла інфармацыю аб меркаванай прычыне выбуху ў Пінску. Мяркуецца, што на фабрыцы адбыўся выбух драўнянага пылу, які стаў магчымым ў выніку парушэння рэжыму эксплуатацыі абсталявання на вытворчасці драўняна-паліўных гранул.

Іншымі словамі, папярэдняй прычынай выбуху МНС лічыць адсутнасць неабходнай вентыляцыі ў памяшканні.

Аб вялікай запыленасці на месцы катастрофы «НН» паведамілі і супрацоўнікі фабрыкі.

Так званыя «аб’ёмныя выбухі» з’яўляюцца адной з самых небяспечных з’яваў на вытворчасці. Пры адсутнасці неабходнай вентыляцыі у памяшканнях невялікіх памераў (мукамольны цэх, прадпрыемства па перапрацоўцы цукру, вугальная шахта) шчыльнае воблака пылу любога гаручага рэчыва робіцца небяспечным. У такіх умовах дастаткова мізэрнай крыніцы агню, каб адмыўся выбух.

Выбух дробнага драўлянага пілавіння, узнятага ў паветра, здольны бурыць сцены з прычыны вялізнай плошчы кантакту рэчыва з кіслародам.

За долі секунды ўспыхвае надзвычай вялікі аб’ём.

Да таго ж

вытворчасць паліўных гранул (пелетаў) звязанае з высокімі тэмпературамі.

Сыравіну для іх (пілавінне, кару і г.д.) расціраюць да кансістэнцыі мукі. Атрыманая маса ідзе ў сушылку, адтуль — у прэс-гранулятар, дзе драўляную муку сціскаюць у гранулы. Можна ўявіць, да якіх тэмператураў награецца паветра ў цэху, калі адна тона гранулаў выходзіць з 4–5 кубаметраў сыравіны.

У МНС таксама зазначаюць, што паводле сведкаў здарэння ў памяшканні цэху выбухнулі паравыя катлы, аднак гэтая версія пакуль не пацверджаная.

На прадпрыемстве «Пінскдрэў» ніякіх каментароў адносна здарэння 25 кастрычніка не даюць. У прыёмнай генеральнага дырэктара холдынга Ларана Арэніча размаўляць аб выбуху на прадпрыемстве адмовіліся.

Канчаткова прычыны здарэння стануць вядомымі пасля разбору завалаў.