«Белтэлекам» можа пазбавіцца манапольнага права на пропуск міжнароднага трафіку

Міністэрства сувязі і інфарматызацыі Беларусі абвясціла аб правядзенні конкурсу па прадстаўленні аператарам электрасувязі права на пропуск міжнароднага трафіку і далучэнне да сетак электрасувязі замежных дзяржаваў.

«У выпадку, калі конкурс адбудзецца, на рынак Беларусі прыйдуць іншыя, у тым ліку замежныя, аператары, якія, згодна з умовамі конкурсу, атрымаюць права на пропуск часткі міжнароднага трафіку і на далучэнне да сетак электрасувязі іншых дзяржаваў.

Гэта значыць, дзяржаператар „Белтэлекам“ , які цяпер ажыццяўляе пропуск усяго аб’ёму трафіку, фактычна пазбавіцца сваёй манаполіі», — растлумачылі прадстаўнікі ведамства.

Як напісана ў аб’яве аб правядзенні конкурсу, якое было размешчанае ў аўторак на афіцыйным сайце Мінсувязі, конкурс будзе праводзіцца з 1 снежня 2010 па 31 студзеня 2011.

Прадметам конкурсу з’яўляецца прадстаўленне ва ўстаноўленым заканадаўствам парадку пераможцу права на пропуск міжнароднага трафіку і далучэнне да сетак электрасувязі замежных дзяржаваў.

Такім чынам, пераможца конкурсу падчас прадстаўлення паслуг па перадачы дадзеных, зможа далучаць да сетак электрасувязі замежныя дзяржавы і ажыццяўляць праз іх пропуск міжнароднага трафіку перадачы дадзеных (за выключэннем паслугі тэлефаніі па IP-пратаколе).

Мінсувязі пачне выдаваць конкурсныя дакументы 26 кастрычніка.

Прадстаўнікі міністэрства не змаглі назваць прыкладную колькасць аператараў, якія змогуць узяць удзел у конкурсе зыходзячы з узроўню сваёй тэхнічнай аснашчанасці. Аднак спецыялісты падкрэслілі, што ў Беларусі налічваецца досыць вялікая колькасць інтэрнэт-аператараў. Акрамя таго, у Мінсувязі звярнулі ўвагу, што ў конкурсе змогуць узяць удзел і замежныя аператары электрасувязі.