Многа гадоў запар навучэнцы школ Столінскага раёна выязджаюць на аздараўленне ў Італію. Цэлы месяц школьнікі праводзяць у населеных пунктах на поўначы краіны, дзе папраўляюць сваё здароўе, набіраюцца новых сіл і ўражанняў.
Беларусь і Італія – краіны, размешчаныя за тысячы кіламетраў адна ад другой. Але нягледзячы на гэта, паміж нашымі народамі ўстаноўлены сяброўскія сувязі. Гэта дае магчымасць ўзаемнага азнаямлення з жыццём, гісторыяй і культурай абедзвюх краін.
Дэлегацыя з Італіі нядаўна прыбыла на Століншчыну. Чацвёра дарослых і пяцёра дзяцей прыехалі ў нашу сінявокую краіну, каб акунуцца ў яе самабытную і непаўторную культуру.
Першы дзень дэлегацыя правяла ў сталіцы. Потым наведалі Асавую, Плотніцу. У райцэнтры сабраліся бацькі са Століна, Рэчыцы, Веляміч.
У Столінскім ГДК гасцей сустракалі дзеці, настаўнікі, бацькі. Першыя хвіліны сустрэчы – самыя кранальныя: вітанні, абдымкі.
Для сяброў з Італіі была падрыхтавана прывітальная праграма. Дэлегацыю з надзвычай каларытнай дзяржавы сустракалі хлебам-соллю.
У фае дома культуры выступіў заслужаны аматарскі калектыў Рэспублікі Беларусь народны ансамбль народнай музыкі “Выцінанка” з салісткамі Аленай Дубойскай і Вікторыяй Падун. Калектыў, дарэчы, прадстаўляў Беларусь на Міжнароднай выставе “ЭКСПА-2015” у Мілане.
Дзіцячыя танцавальныя калектывы Столінскага ГДК пад кіраўніцтвам Алены Волкавай паказалі танцы “Крыжачок”, “Ладушкі-аладушкі”, “Беларусь”.
Праграма працягнулася вясёлымі забавамі з героем мультфільмаў Мішкам: рытмічнымі танцамі, паравозікам.
Ад імя бацькоў выступіла Анжаліка Калавур: “Мы рады вітаць вас на беларускай зямлі. Вы вельмі гасцінна прымаеце нашых дзетак у сябе, гэта бачна па іх вачах, якія свецяцца радасцю. У такіх выпадках не патрэбен перакладчык, усе эмоцыі зразумелы па люстэрку душы. Калі дзеці напоўнены радасцю і шчасцем ад знаходжання ў вашай краіне, гэта дорага каштуе”. Яна падарыла прысутным песню аб добрым настроі.
Настаўніца гімназіі Вольга Ражнова, якая суправаджае дзяцей на аздараўленне, прызналася у самых трапяткіх пачуццях да краіны, абрысы на карце якой нагадваюць бот, выказала словы падзякі за запрашэнні і арганізацыю аздараўлення.
Старшыня камітэта па арганізацыі аздараўлення ў Італіі Сабрына Цірабоскі выступіла перад прысутнымі: “Сёння – вельмі нацыянальны дзень. Мы хочам падзякаваць бацькам, якія адпускаюць дзяцей адпачываць. Час, які яны праводзяць у нас, вельмі разнастайны і насычаны. Увесь год мы рыхтуемся і чакаем нашых маленькіх гасцей. Выказваем
удзячнасць за цёплы прыём”.
У гасцей, бацькоў і дзяцей была магчымасць пагутарыць, падзяліцца ўспамінамі і ўражаннямі. Пасля дэлегацыя адправілася ў Столінскі краязнаўчы музей, здзейсніла водную прагулку ў Кораб’е.
Любоў Падарэцкая з Рэчыцы расказала карэспандэнту: “Мой старэйшы сын Арцём два гады запар ездіў у Сільвіну, гэта паўночная частка Італіі. Месяц жыў у італьянскай сям’і, якая вельмі дружалюбна прымала яго. Эмоцыі і ўражанні вельмі добрыя. Спадабалася ўсё: клімат, насычаная праграма, умовы пражывання. У буднія дні вучні займаліся ў школе з настаўнікам, выхадныя праводзілі з сем’ямі. Наведвалі шмат мясцовых славутасцяў. Вельмі ўдзячны арганізатарам за магчымасць наведаць Італію”.
Святлана МАРОЗ
Фота аўтара