21 сакавіка на базе аддзялення дзённага знаходжання для грамадзян сталага ўзросту Столінскага тэрытарыяльнага цэнтра сацыяльнага абслугоўвання насельніцтва прайшло мерапрыемства “Жыве між намі дудар беларускі…”, прысвечанае 210-годдзю з дня нараджэння Вінцэнта Дуніна-Марцінкевіча.
На гэты раз пасяджэнне ўдзельнікаў літаратурнага гуртка арганізавалі ў выглядзе вуснага часопіса. Ініцыятарам правядзення мерапрыемства выступіла загадчык аддзялення дзённага знаходжання для грамадзян сталага ўзросту Святлана Леанідаўна Аблавацкая. Кіраўнік камп’ютарнага гуртка Юлія Шэпелева падрыхтавала для сустрэчы мультымедыйную прэзентацыю “Вінцэнт Дунін-Марцінкевіч: асоба і творчасць”, аматары літаратурнай дзейнасці – выстаўку кніг “Больш за ўсё я бацькаваму краю адданы”.
Мерапрыемства прайшло ва ўтульнай, сяброўскай атмасферы, напоўненай нацыянальным каларытам і прыгожай беларускай гаворкай.
Вядучыя Ларыса Фёдараўна Вырко, Вольга Андрэеўна Шаламіцкая і Людміла Мікалаеўна Карчэўская нагадалі прысутным асноўныя вехі жыцця і творчасці класіка беларускай літаратуры, падкрэслівалі свае словы вершаванымі радкамі і цытатамі. Зацікавіў усіх і відэаўрывак з вядомай камедыі “Пінская шляхта”, а таксама звесткі пра тое, як сёння ўшаноўваюць памяць аднаго з пачынальнікаў новай беларускай літаратуры і драматургіі, паэта, тэатральнага і грамадскага дзеяча.
Напрыканцы мерапрыемства яго ўдзельнікі яшчэ доўга абмяркоўвалі пачутае, планавалі наступныя сустрэчы і іх тэматыку. Яны адзначылі, што работа літаратурнага кафэ прыносіць ім задавальненне, бо аддзяленне дзённага знаходжання Столінскага ТЦСАНа наведваюць аднадумцы, якіх аб’ядноўваюць агульныя інтарэсы, актыўная жыццёвая пазіцыя і імкненне дадаць штодзённым шэрым фарбам каляровай палітры і прыемных уражанняў.
Людміла КАСПЯРОВІЧ
Фота аўтара