«Ляпіс Трубяцкой» скончыў тур па Беларусі

Апошнім горадам у гастрольным туры па Беларусі гурту быў Гродна. Тут яны і выступілі вечарам 20-га сакавіка ў клубе «Парламент».

Гарадзенцы да такіх зорак пакуль не звыклі. Калі ў Менск прыязджаюць Rammstein і Apocaliptika, то Гродна цешыцца ўвагай з боку Вайцюшкевіча і Крамы. Таму адзін з самых прэстыжных клубаў горада ў дзень канцэрту Міхалка і кампаніі быў запоўнены. Што праўда, квіткі ў продажы былі і непасрэдна перад канцэртам, зважаючы на даволі вялікі для Гродна кошт у 45 тысяч.

Грэлі публіку перад зорным канцэртам берасцейцы з «Дай Дорогу». Аднак неяк без асаблівага імпэту. Вакалісту згаданага гурту не дапамаглі нават намаганні спяваць са спушчанымі штанамі.

Ляпісы на брак імпэту не наракалі. Публіка спявала і таньчыла, чаму вельмі спрыяла надзвычай дэмакратычная палітыка клуба. Што праўда, гук мог бы быць і лепшы. Старых песень Ляпісы амаль не гралі – спрэс праграма з трох апошніх альбомаў. А да знакамітых ужо прамоў Міхалка дадаліся беларускамоўныя пра тое, што «Душой я вольны чалавек і гэткім буду ўвесь свой век!» ды шмат чаго іншага.

Канцэрт цягнуўся больш чым дзве гадзіны. Музыкаў выклікалі на сцэну двойчы, а калі напрыканцы канцэрта загучалі першыя акорды «Freedom Belarus!» то іх адразу ж заглушылі задаволеныя воклічы аматараў гурту. Яе, гэтую песню, спявалі ўсёй залай, а над натоўпам хтосьці ўзняў бела-чырвона-белы сцяг.

Міхалка ў Беларусі любяць – гэта факт. Гурт, які ў пачатку 90-ых прынёс новы подых у беларускую папулярную музыку, робіць гэта і сёння. Як бы дзіўна тое не гучала.

Наступны беларускі выступ гурта «Ляпіс Трубяцкой» адбудзецца на рок-фестывалі «Паляна».