Ёка Она ўзнагародзіла Pussy Riot прэміяй імя Джона Ленана

Узнагароду 21 верасня атрымае ў Нью-Ёрку муж удзельніцы групы Надзеі Талаконікавай Пётр Вярзілаў. Акрамя Ёкі Оны прэмію будзе ўручаць выканаўчы дырэктар Amnesty International у ЗША Сюзан Носел.

Ёка Она патлумачыла, што ўзнагароду міра яна вырашыла ўручыць удзельніцам групы Pussy Riot за іх унёсак у справу барацьбы за свабоду самавыяўлення жанчын.

Ёка Она ў 2002 годзе заснавала прэмію міра, каб ушанаваць памяць свайго мужа Джона Ленана. Дзень народзінаў легендарнага музыканта 9 кастрычніка. Сёлета ў 72-ю гадавіну Ленана адбудзецца ўрачыстая цырымонія ў Рэйк'явіку.  Прэмію ўручаюць за ўнёсак у справу абароны правоў чалавека і за барацьбу за мір ва ўсім свеце.

Акрамя Pussy Riot узнагароду атрымалі яшчэ чатыры чалавекі: Рэйчэл Коры, амерыканка, загінуўшая ў 2003 годзе, якая змагалася за правы палястынцаў у Ізраіле, пісьменнік Крыстофер Хітчэнс і Джон Перкінс, які напісаў кнігу  "Confessions of an Economic Hit Man" у 2004 годзе. Імя пятага лаўрэата пакуль невядома.

Ёка Она звярталася разам з іншымі дзеячамі культуры з заклікам вызваліць удзельніц групы Pussy Riot, а 8 жніўня асабіста звярнулася да Ўладзімра Пуціна ў твітары.