У Венгрыі правыя разграмілі сацыялістаў

Лідэр ФІДЭС Віктар Орбан ужо быў прэм"ерам у 1998-2002 гадах.

Правацэнтрысцкая партыя ФІДЭС (Венгерскі грамадзянскі саюз) атрымала пераканаўчую перамогу ў другім туры парламенцкіх выбараў у Венгрыі. Паводле звестак іх Цэнтрвыбаркама, па выніках падліку больш як 99% галасоў правацэнтрысты атрымалі амаль 68% і, адпаведна, 263 з 386 месцаў у парламенце.

Гэта самая буйная перамога, атрыманая якой‑небудзь партыяй на выбарах у Венгрыі пасля падзення камуністычнага рэжыму 20 гадоў таму.

У нядзельным туры галасавання вырашаўся лёс амаль траціны дэпутацкіх мандатаў. Першы тур галасавання адбыўся два тыдні таму.

Яшчэ адна рэвалюцыя

Лідэр ФІДЭС Віктар Орбан, выступаючы перад сваімі прыхільнікамі ў Будапешце, заявіў, што «сёння на выбарчых участках адбылася рэвалюцыя».

Орбан паабяцаў «падняць Венгрыю з руін сацыялізму», стварыць новыя працоўныя месцы, знізіць падаткі і скараціць бюракратычны апарат, у тым ліку і парламент краіны.

У сваёй прамове лідэр ФІДЭС, які зойме цяпер пасаду прэм’ер‑міністра, сказаў, што «народ Венгрыі пазбавіўся ад рэжыму алігархаў, якія злоўжываюць уладай, і ўсталяваў новы рэжым, рэжым нацыянальнага адзінства».

Сацыялісты сыходзяць у адстаўку

Сацыялісты, якія былі ва ўладзе ў Венгрыі цягам апошніх васьмі гадоў, засталіся на другім месцы з вялізным адставаннем ад ФІДЭС: у іх толькі 15% галасоў і 59 месцаў. Пасля абвяшчэння вынікаў выбараў ўсё кіраўніцтва Сацыялістычнай партыі Венгрыі падало ў адстаўку.

Крайнеправая партыя «Ёбік» ўпершыню прайшла ў парламент, набраўшы адразу 12% (47 месцаў). 16 дэпутацкіх мандатаў (4,1% галасоў) дасталіся новай партыі зялёных «Палітыка можа быць іншай».

Другі тур праводзіўся ў 57 выбарчых акругах, дзе два тыдні таму ніводны з прэтэндэнтаў не набраў 50% галасоў.

Большасць у дзве траціны дасць ФІДЭС магчымасць ўносіць змены ў канстытуцыю.

Сацыялісты ставілі сабе ў заслугу тое, што за гады свайго праўлення яны стварылі 100 тысяч працоўных месцаў, паспяхова правялі дзяржаўны карабель праз бурныя вады фінансавага крызісу і ўмацавалі законнасць і парадак.

Бі-Бі-Сі