Аэрапорты свету павышаюць захады бяспекі

Усе найбуйнейшыя аэрапорты свету адрэагавалі на спробу тэракту на борце самалёта амерыканскай авіякампаніі павышэннем захадаў бяспекі.

Усіх турбуе той факт, што зламыснік здолеў бесперашкодна пранесці на сваім целе пад адзеннем бомбу ў самалёт, і шмат хто задумваецца над тым, каб увесці больш дасканалыя сістэмы сканавання. А пакуль у першую чаргу ўзмоцнены кантроль:

«На ўсе рэйсы ў ЗША будзе дадатковая праверка перад пасадкай, ‑‑ кажа Джоні Мюлер, начальнік службы бяспекі Капенгагенскага аэрапорта. ‑‑ Гэта як бы дадатковы фільтр, дзве праверкі замест адной. Мы будзем правяраць практычна ўсе, будзем у літаральным сэнсе слова мацаць усіх пасажыраў, усе торбы».

Такія захады бяспекі стварылі вялізныя чэргі ў зонах дагляду ды таксама затрымкі рэйсаў. Эксперты нагадваюць, што гэта можа знізіць цікавасць да паветраных падарожжаў. Аднак большасць пасажыраў, апытаных у аэрапорце Амстэрдама, адкуль узняўся на борт няўдалы тэрарыст, ухвалілі новаўвядзенні.

ЗША істотна зрабілі больш жорсткімі захады бяспекі на авіярэйсах. У прыватнасці, пасажырам будзе забаронена перамяшчацца па салоне самалёта ў апошнюю гадзіну палёту, а таксама трымаць што‑небудзь у руках або на каленях. Больш актыўна будуць прымяняцца і іншыя метады праверкі‑выкарыстанне службовых сабак і праца псіхолагаў, якія спецыялізуюцца на аналізе паводзінаў падазроных людзей у натоўпе.