У Шчучыне стартаваў сезон пляжнага футбола ў Беларусі. Пачатак айчыннага бічсокера-2019 атрымаўся вельмі ўдалым для кіраўскіх футбалістаў.
Па склаўшайся традыцыі ў першым матчы сезона вызначаўся ўладальнік суперкубка Беларусі. У гэты раз паспрачацца за ганаровы трафей атрымалі права чэмпіёны мінулага года каманада “Гроднааблспорт” і леташні фіналіст Кубка Беларусі “Шчучын” . Маладая каманда са Шчучына узмацнілася прадстаўнікамі каманды “Кіраўск-СДЮШАР”, якія выступаюць за нацыянальную зборную Беларусі — гэта варатар Канстанцін Магалецкі, палявыя ігракі Вадзім Бокач, Юрый Пятроўскі і Арцемій Дрозд. І не прагадала. Менавіта яны фактычна “зрабілі” перамогу гаспадароў пляцоўкі — 5:4. Шмат пагроз на вароты ліквідаваў галкіпер, а кожны з вышэй названых палявых ігракоў не толькі забяспечваў ініцыятыву матча, а і, да таго ж, адзначыўся голам у вароты гродзенскай каманды.
У выхадныя адбыліся матчы першага тура чэмпіяната краіны. Сёлета ўдзел у ім прымае шэсць каманд. Зыходзячы з рэзультатаў сустрэч і самой гульні, фававрытам стала каманда “Кіраўск-СДЮШАР”.
У першы дзень нашы землякі сустракаліся з “М-Сіці” з Мазыра. Поўная перавага футбалістаў Кіраўска, канчатковы лік — 8:4. Тры галы забіў Арцемій Дрозд, па адным мячу ў вароты сапернікаў адправілі Юрый Пятроўскі, Сяргей Рабінін, Ягор Рэмізаў, Алег Якаўлеў і Ягор Гардзецкі.
Назаўтра наша каманда правяла 2 паядынкі, у якіх таксама дабілася перамог. Спачатку ва ўпартым матчы быў адолены брэсцкі “ProDom” — 3:1. Галы на свой рахунак запісалі Вадзім Бокач і Алег Якаўлеў (плюс аўтагол брастчан). А потым была поўная перавага над леташнім чэмпіёнам “Гроднааблспортам” — 8:4. Хет-трык — на рахунку Юрыя Пятроўскага, дубль — у Ягора Гардзецкага, па адным мячы забілі Вадзім Бокач, Антон Акуліч і Арцемій Дрозд.
Набраўшы 9 ачкоў, “Кіраўск-СДЮШАР” захапіла лідарства ў турнірнай табліцы. У бліжэйшыя выхадныя пройдзе другі тур чэмпіяната, які прыме Гродна.