Шумилинские милиционеры провели спортивный праздник

Спартыўнае свята ля Заронаўскага возера
Супрацоўнікі райаддзела ўнутраных спраў выступаюць за здаровы лад жыцця. Прычым гэта пацвярджаюць уласным прыкладам, пра што сведчыць не толькі ўдзел у абласных спартыўных баталіях, але і летняе спартыўнае мерапрыемства, якое прайшло ў мінулыя выхадныя на Заронаўскім возеры і было прысвечана дню ўтварэння РАУС.

“На Заронаўскае возера сабраліся нашы супрацоўнікі, якім у гэты дзень не выпала быць на дзяжурстве, – расказаў намеснік началь-ніка РАУС Аляксандр Шумінскі. – Некаторыя прыехалі цэлымі сем’ямі, з дзецьмі. Усім разам было цікава бавіць вольны час, удзельнічаць у розных конкурсах, варыць рыбную юшку”.
Свята пачалося са спаборніцтваў рыбаловаў. Самым вялікім уловам змог пахваліцца начальнік ізалятара часовага ўтрымання  РАУС Сяргей Асташонак, самую вялікую рыбіну злавіў міліцыянер-вадзіцель аператыўна-дзяжурнай службы Дзмітрый Ярыга, у намінацыі “Лепшы рыбак маленькай рыбкі” перамог оперупаўнаважаны аддзялення крымінальнага вышуку Аляксей Буракевіч. Усе пераможцы былі ўзнагароджаны граматамі і каштоўнымі падарункамі.
Удзельнікам свята вельмі спадабаўся турнір па пейнтболе. Асабліва ў захапленні былі дзеці. Тыя, хто не браў удзел у турніры, мераліся сіламі ў конкурсе “Лепшая рыбная юшка”. Перамагла зборная каманда ДАІ і ўчастковых інспектараў РАУС. Гэта ж каманда стала першай і ў спартыўнай эстафеце. Увогуле ўсе ўдзельнікі паказалі свае спрыт, уменне і хуткасць, адзначыў старшыня журы начальнік аддзела Алег Калеснікаў.
Такое спартыўнае свята было праведзена ў РАУС упершыню. Дадому ўсе раз’язджаліся з добрым настроем і незабыўнымі ўражаннямі. Міліцэйскія сем’і на свяце не толькі пазнаёміліся, але і пасябравалі, знайшлі агульныя інтарэсы. Многія выказвалі пажаданні праводзіць падобныя святы штогод.
Ларыса ЗАЙЦАва