У “Смаргоні” з’явяцца новыя футбалісты
Дванаццаць гадоў назад Мікалай Рындзюк абараняў колеры нацыянальнай зборнай. Цяпер ён будзе выступаць у першай лізе за футбольны клуб “Смаргонь”.
У адрозненне ад многіх іншых прафесійных клубаў, нашы землякі не спяшаліся распачынаць міжсезонныя трэніроўкі.Каманда выйшла з адпачынку толькі на гэтым тыдні. Галоўны трэнер ранейшы – Павел Бацюта, а вось склад футбалістаў за гэту зіму зменіцца больш чым напалову.
Больш за дзесяць гульцоў развіталіся са “Смаргонню”. Сярод іх двое выхаванцаў маладзечанскага футбола – 35-гадовы паўабаронца Міхаіл Макоўскі ўжо завяршыў сваю кар’еру, а 23-гадовы нападаючы Сяргей Корсак падпісаў кантракт на два гады ў вышэйшай лізе, з новаполацкім “Нафтанам”.
Адпаведна вялікім будзе і папаўненне складу. Ужо цяпер можна казаць аб чатырох вядомых у беларускім футболе навічках. Двое з іх нават маюць досвед выступленняў у нацыянальнай зборнай. Паўабаронца Віталь Валадзянкоў (1976 года нараджэння) прыйшоў з “Гарадзеі”, у свае лепшыя сезоны выступаў за мінскае “Дынама”. Нападаючы Мікалай Рындзюк (1978) у мінулым годзе ўжо згуляў сем матчаў за смаргонскі клуб, а потым паехаў крыху падзарабіць грошай у чэмпіянаце Узбекістана; свае лепшыя сезоны ён правёў за барысаўскі БАТЭ. Абаронца Сяргей Кавальчук (1978) прыйшоў з мазырскай “Славіі”, а нападаючы Сяргей Крот (1980) – са “Слуцка”.
Прыйшлі навіны з рэспубліканскай федэрацыі, што чэмпіянат першай лігі стартуе 20 красавіка, а завяршыцца даволі позна, 23 лістапада. Кіраўніцтвам смаргонскага клуба запланаваныя тры вучэбна-трэніровачныя зборы. Два з іх пройдуць у Беларусі, бліжэйшы – у Стоўбцах з 4-га па 16-га сакавіка. Яшчэ адзін збор, перад стартам чэмпіянату, мяркуецца правесці на тэрыторыі Польшчы.
Успомнім статыстыку
Смаргонская каманда ў прафесійных лігах правяла ўжо адзінаццаць сезонаў. Былі часы пастаянных прызавых пазіцый у першай лізе, былі “залатыя” часы выступлення ў вышэйшай лізе. Гэта якраз тады, з 2005 года па 2008, тут працаваў галоўным трэнерам Георг Кандрацьеў, які цяпер узначальвае зборную краіны.
Пасля вяртання на першалігавыя прасторы каманда выступае стабільна, увесь час трымаецца каля дзясяткі мацнейшых. Праўда, бывалі тыдні, калі даводзілася хвалявацца за тое, каб захаваць месца “пад сонцам”.
Навіны іншых клубаў
За мінулую зіму мацнейшыя клубы беларускай першай лігі змянілі як свае планы агульнага развіцця, так і мэты на бліжэйшы час.
Задача па выхадзе ў вышэйшую лігу пакуль пастаўленая толькі перад футбалістамі “Віцебска”. Тут прызначаны новы дырэктар клуба замест ранейшага, якога крытыкавалі з усіх бакоў. Тут прызначаны і новы галоўны трэнер.
Змяніліся галоўныя трэнеры ў “Гарадзеі” і сталічным СКВІЧы. У мінскім клубе да таго ж значна паменшыўся бюджэт, яны адмаўляюцца ад сталых футбалістаў, будуць давяраць моладзі.
Шмат кадравых перамен яшчэ і ў “Лідзе”, а гомельскі ДБК наогул спыніў сваё існаванне.
У ніжэйпрыведзенай табліцы па кожным чэмпіянаце даецца занятае месца і колькасць згуляных матчаў, а таксама колькасць атрыманых перамог і набытых нічыіх
| 2002 год | першая ліга | 14 месца | 30 | 8 | 5 |
| 2003 год | першая ліга | 3 месца | 30 | 17 | 7 |
| 2004 год | першая ліга | 3 месца | 30 | 14 | 11 |
| 2005 год | першая ліга | 3 месца | 30 | 15 | 9 |
| 2006 год | першая ліга | 2 месца | 26 | 16 | 7 |
| 2007 год | вышэйшая ліга | 10 месца | 26 | 6 | 8 |
| 2008 год | вышэйшая ліга | 8 месца | 30 | 10 | 9 |
| 2009 год | вышэйшая ліга | 14 месца | 26 | 2 | 9 |
| 2010 год | першая ліга | 12 месца | 30 | 8 | 8 |
| 2011 год | першая ліга | 11 месца | 30 | 9 | 7 |
| 2012 год | першая ліга | 10 месца | 28 | 7 | 10 |
Сяргей ГАЙКОВІЧ.
Фота fcmashal.uz.