Павел Няхайчык: "Калі прапускаеш такую бязглуздзіцу, крыўдна ўдвая"

Гулец, які так уразіў галоўнага трэнера "Пары Сен-Жэрмен" Антуана Камбуарэ, пракаментаваў паядынак.

— Што скажаш пра вынік матча?

— Ён нездавальняючы. Мы маглі выйграць 3:1, а прыйшлося задаволіцца нічыёй.

— Французскі клуб чым-небудзь уразіў?

— Не. Хутчэй мы не паказалі сваёй гульні, чым французы штосьці прадэманстравалі на полі. Мы разбіралі іх гульню напярэдадні сустрэчы. У прынцыпе, яны так і дзейнічалі.

— Чаму БАТЭ не паказала сваёй гульні?

— Складана сказаць. Магчыма, таму, што мы трэніруемся ўсяго месяц.

— Але БАТЭ прыбавіў у другім тайме...

— Трэнер у перапынку зрабіў пэўныя карэкціроўкі, і падказкі, як гуляць, і гэта нам дапамагло.

— Чаму Скавыш не забіў пасля твайго паса ў канцы сустрэчы?

— Мабыць, я аддаў дрэнную перадачу...Калі аддаеш такі пас і партнёр не забівае, узнікае думка, што лепш было прабіць самому.

— А пасля гэтага вы прапусцілі...

— Заўсёды непрыемна прапускаць. Але калі прапускаеш такую бязглуздзіцу, то крыўдна ўдвая.

— Персанальна ў нічыёй трэба кагосьці вінаваціць?

— Вінаваціць трэба ўсіх, хто быў на полі.

— Як гулялася ў такое надвор'е?

— Нармальна. Было нават цяплей, чым з кіеўскім "Дынама".

— Падтрымка трыбун адчувалася?

— Вялікі дзякуй тым балельшчыкам, якія не пашкадавалі сябе і прыйшлі на стадыён. Яны ў парадку, а мы, мабыць, не.

— Які будзе настрой на гульню ў адказ?

— Пажывём — пабачым. Хоць, безумоўна, паедзем у Парыж па перамогу.

— Калі б да матча ты сказаў, што будзе нічыя...

— ...далі б наганяй.

Алена АЎЧЫННІКАВА.