Карстэн не стамляецца выйграваць

Спорт-тайм

Адзiн залаты i два сярэбраныя медалi заваявалi беларускiя экiпажы на чэмпiянаце Еўропы па акадэмiчным веславаннi, якi завяршыўся 20 верасня ў Брэсце. "Золата" ў двухразовай алiмпiйскай чэмпiёнкi, шасцiразовай чэмпiёнкi свету Кацярыны Карстэн. У фiнальным заездзе ў класе лодак-адзiночак яна паказала вынiк 7 хвiлiн 40,02 секунды. "Серабро" ў чэшкi Мiркi Кнапкавай (7,43,79), "бронза" — у расiянкi Юлii Левiнай.

Кажучы пра сваё выступленне на чэмпiянаце Еўропы ў Брэсце, чэмпiёнка падкрэслiла, што гэта былi асаблiвыя старты: "Я выступала ў сябе на радзiме, дзе мяне любяць i, вядома ж, чакаюць маёй перамогi. І зрабiла ўсё для таго, каб выйграць. Дарэчы, так як тут радавалiся маёй перамозе, не радавалiся нiдзе." Кацярына Карстэн расказала, што ў пачатку тыдня прыедзе ў Мiнск, дзе будзе весцi размову пра свае далейшыя спартыўныя планы. Двухразовая алiмпiйская чэмпiёнка плануе выступiць i на Алiмпiйскiх гульнях 2012 года, дзе ёй споўнiцца 40 гадоў. Наконт прапановы выступаць за Расiю Кацярына Карстэн адзначыла, што i раней ёй паступалi прапановы дзесьцi выступаць, але яе жаданне — выступаць толькi за Беларусь.

Сярэбраны медаль чэмпiянату Еўропы заваявала мужчынская чацвёрка парная (Валерый Радзевiч, Кiрыл Лемяшкевiч, Станiслаў Шчарбачэня, Дзянiс Мiгаль). На апошнiх 500 метрах дыстанцыi беларускi экiпаж абышоў палякаў i немцаў, саступiўшы толькi ўкраiнцам — чэмпiёнам свету. Сярэбраныя ўзнагароды заваяваў i экiпаж жаночай васьмёркi, якi на фiнiшы абышоў украiнак i саступiў румынкам.

У чэмпiянаце Еўропы узялi ўдзел каля 500 спартсменаў з 32 краiн. За зборную Беларусi на турнiры выступалi 46 атлетаў. Гаспадары выступалi ў 13 з 14 вiдаў праграмы.