На працягу ўжо сямі год запар наш абласны цэнтр называюць сапраўднай сырнай сталіцай. І нездарма. Кожны верасень гродзенцы адзначаюць Дзень горада, у рамках якога праходзіць адно з самых смачных і цікавых мерапрыемстваў – адкрыты фестываль сыру. Сёлета ён аб’яднаў у сабе дваццаць чатыры вытворцы з усёй рэспублікі, і, што немалаважна, Карэлічы таксама не засталіся за кулісамі.
Прадукцыя Карэліцкага сырцэха “Навагрудскія дары” філіяла ААТ “Лідскі малочна-кансервавы камбінат” прымае ўдзел у фестывалі з самага пачатку, калі колькасць вытворцаў-удзельнікаў яшчэ не была такой шматлікай. Сёлета ж VII адкрыты фестываль сыру налічваў семдзесят пяць відаў, сярод якіх былі і зусім незвычайныя: з пажытнікам, труфелем, водарам чаромхі і карамелі. Але, нягледзячы на далікатэсы, якія мелі ўсе магчымасці атрымаць шматлікія дыпломы фестывалю, народнаму журы прыйшліся даспадобы тыя сыры, якім яны аддаюць перавагу ўжо не першы год.
– Дэгустацыя праводзілася “ўсляпую”: усе абразцы былі засакрэчаныя, – расказывае начальнік Карэліцкага сырцэха Ларыса Рапавец. – Што здзівіла і прыемна ўразіла, дык гэта тое, што людзі па адным толькі смаку вызначалі, што гэты, напрыклад, – карэліцкі “Адыгейскі”, а гэты – “Сулугуні”. Значыць, ведаюць. Значыць, любяць.
Аддаюць перавагу дарослыя і маленькія прадукцыі Карэліцкага сырцэха ўжо не першы год: кожную восень кіраўніцтва прадпрыемства вяртаецца з Гродна з узнагародамі, што з’яўляецца сведчаннем не толькі высокай якасці прадукцыі, але і самаадданасці і працавітасці работнікаў цэха. Зараз іх, дарэчы, пяцьдзясят чалавек.
Самую высокую ўзнагароду, Дыплом І ступені, атрымаў сыр “Адыгейскі класічны”, які з году ў год не губляе свае пазіцыі. Знешне гэты сыр, падобны да тварагу, можна ўжываць як асобна, так і рабіць з яго румяныя сырнікі альбо салаты – як душа пажадае. Яго бліжэйшы родзіч, “Адыгейскі вэнджаны”, далёка не адстаў і заняў другое месца ў намінацыі сярод сыроў з напаўняльнікамі, у тым ліку вэнджаных. Прафесійнае журы было больш строгім і прысудзіла “Адыгейскаму класічнаму” Дыплом ІІІ ступені. Але, улічваючы колькасць прадстаўленых на фестывалі відаў сыроў, можна смела гаварыць: гэта перамога.
– Штогод крэатыў і вынаходлівасць сыраробаў у краіне расце, – адзначае Ларыса Рапавец, – і сярод шматлікіх сыроў з труфелем або мёдам трымаць узровень такой класічнай прадукцыі як наша, вельмі цяжка. Але, як бачым, спажыўцы застаюцца вернымі і не праходзяць міма таго, што мы вырабляем для іх з такой любоўю.
З нагоды вельмі важнай даты – 75-годдзя заснавання Гродзенскай вобласці, калектыў Карэліцкага сырцэха сваю перамогу прысвяціў менавіта гэтай падзеі, зрабіўшы значны ўнёсак у гісторыю любай Гродзеншчыны.
З гэтага года “Сулугуні” і “Адыгейскі вэнджаны” ад Карэліцкага сырцэха ўпершыню пастаўляюцца ва Украіну. Усяго ж па краіне тэмп росту экспарту сырнай прадукцыі за сем месяцаў бягучага года перавысіў 123%. Па дадзеных аператыўных справаздач Еўракамісіі, за студзень-ліпень 2019 года Беларусь уваходзіць у чацвёрку вядучых экспарцёраў сыру, саступаючы толькі Еўрапейскаму саюзу, ЗША і Новай Зеландыі.
Вікторыя КАСЦЮК
Фота аўтара