12 верасня 2011 года быў падпісаны ўказ Прэзідэнта аб утварэнні ў Рэспубліцы Беларусь Следчага камітэта. Кірыл Абрамовіч у Сенненскім аддзеле СК з першых дзён.
Кірыл Абрамовіч
Прыйшоў у яго Кірыл не навічком. Вопыт работы, накоплены ў РАУС, нікуды не дзеўся.
Прафесійны выбар хлопец зрабіў яшчэ ў школьныя гады пад уздзеяннем бацькі. Аляксандр Абрамовіч даслужыўся ў органах унутраных спраў да звання маёра, працяглы час кіраваў пашпартным сталом Сенненскага РАУС.
— Каб паступіць у Магілёўскую школу міліцыі, я рыхтаваўся даволі сур’ёзна: наведваў факультатыўныя заняткі, працаваў над павышэннем фізічнай падрыхтоўкі, — успамінае мой субяседнік. Сёння Кірыл Абрамовіч — адзін з самых прадуктыўных супрацоўнікаў Сенненскага РАСК. Толькі з пачатку сёлетняга года скончыў 16 крымінальных спраў, давёўшы іх да суда. Многія, калі не ўсе, пакідаюць адбітак не толькі ў памяці.
— Да крыві, трупаў, спецыфічнага паху на месці дарожна –транспартнага здарэння прывыкнуць нельга, — упэўнены Кірыл Абрамовіч. Ён як раз спецыялізуецца на расследаванні крымінальных спраў, што ўзбуджаюцца ў сувязі з ДТЗ.
Аляксандр Абрамовіч
Добра помніцца і першая справа, якую лейтэнант Абрамовіч расследаваў яшчэ працуючы ўчастковым інспектарам па гораду. Як і затрыманне мацёрага крымінальнага злачынцы, які на пачатку 2000 –ых абакраў магазін у Студзёнцы. Як высветлілася, першы раз на зону зэк трапіў яшчэ на падставе ўказа Сталіна.
— За адно дзякую лёс – за ўсе гады службы ў праваахоўных органах ні разу не давялося выкарыстаць табельную зброю. Хоць даставаць пісталет з кабуры давялося, калі ў адной кватэры на мяне пайшоў з нажом нецвярозы гаспадар, — зноў паглыбляецца ва ўспаміны Кірыл Абрамовіч. – Дзякаваць бога ў апошнія гады людзі менш сталі злоўжываць алкаголем. Нядаўна я падлічыў, з фігурантаў сёлетніх маіх крымінальных спраў толькі двое ў час учынення злачынства былі нецвярозымі.
За прайшоўшыя гады ад юнацкага погляду на працу ў органах, ад рамантычнага антуражу не засталося і следу. Яго змыла паўсядзённая праца, якая мае на ўвазе выезды ў складзе аператыўнай групы на месца злачынстваў, працяглая работа са сведкамі і падазронымі, афармленне і аналіз пратаколаў дазнання, іншых дакументаў, без якіх не абыходзіцца ні адна крымінальная справа.
Яшчэ адным накірункам у следчай дзейнасці Кірыла Абрамовіча з’яўляецца работа па расследаванні злачынстваў, учыненых непаўналетнімі. Як правіла, пры афіцыйных зносінах з імі патрабуецца прысутнасць адваката, педагога ці бацькоў, што, безумоўна, ускладняе следчыя дзеянні і працу следчага. Але інакш нельга.
— На ўсё жыццё мне запомніліся бацькавы словы, пачутыя на пачатку маёй прафесійнай кар’еры, калі неяк звярнуўся за парадай: “Рабі па законе”. А яшчэ ў падсвядомасці заўжды трымаеш, што падлеткі ўчыняюць злачынствы пад уздзеяннем чужога аўтарытэту, эмоцый, што перад табой чалавек у пачатку жыцця, — вызначае сваё крэда следчы і асоба Кірыл Абрамовіч.
Аляксандр ІЎЕЎ.