Шаснаццаць арганізацый і ўстаноў прынялі ўдзел у гарадскім суботніку, які прайшоў у Глуску 23 сакавіка

Шаснаццаць арганізацый і ўстаноў прынялі ўдзел у гарадскім суботніку, які прайшоў у Глуску 23 сакавіка. Па словах начальніка аддзела па землеўпарадкаванні райвыканкама Вячаслава Асташэвіча, у справе навядзення парадку прымалі ўдзел як дарослыя, так і дзеці.

У прыватнасці, школьнікі прыбіралі парк каля школы № 2 і дарогу, што вядзе да зоны адпачынку “Лодачная станцыя” (там, дзе ўжо падсохла), бялілі дрэвы ў садах. Працоўным калектывам таксама былі выдзелены тэрыторыі гарпасёлка: каму — прылягаючыя да прадпрыемства, каму — агульнага карыстання. Так, работнікі дзіцячага садка № 3 падмялі тэрыторыю вакол храма Раства Хрыстова, што па вуліцы Жыжкевіча. Аддзел па адукацыі, спорце і турызме працаваў у раёне стадыёна, на гарадскім вале (завулак Рачны), выдаляў расліннасць па завулку Паркавым. Дарожнікі з ДРБУ-213 наводзілі парадак і спільвалі кусты на з’ездзе з вуліцы Гагарына на Рачную (перад мостам праз Пціч). У ліку іншых тэрыторый работнікам “Жылкамгаса” было даручана месца перакрыжавання вуліц Гагарына і Горкага. Пасля чысткі канала П-2-1 (што працякае паўз гаспадарчы магазін і перасякае вуліцу Луначарскага) работнікі ПМК-86 разроўнівалі глебу па яго краях. Навядзеннем парадку на сваёй аўтабазе займалася раённае спажывецкае таварыства, але пафарбаваныя вароты — толькі пачатак справы, заўважыў Вячаслаў Асташэвіч, пільнай увагі там патрабуе і ўся агароджа. Па яго словах, узорна папрацаваў на гарадскім суботніку калектыў глускага ўчастка электрасувязі: тэрыторыю агульнага карыстання, што насупраць малога прадпрыемства “Гарант”, яны прывялі ў ідэальны парадак. Зрэшты, зробленым не варта задавольвацца і тым больш спыняцца на гэтым, падкрэсліў начальнік аддзела па землеўпарадкаванні, паколькі ў раёне, як і па вобласці ў цэлым, прадаўжаецца месячнік па добраў-парадкаванні, а значыць, навядзенне парадку ў Глуску і ў сельскіх населеных пунктах будзе прадоўжана. І тут мясцовая ўлада па-ранейшаму разлічвае на актыўны ўдзел у гэтай агульнай справе ўсяго насельніцтва, а не толькі працуючых, каб чыста і акуратна было каля кожнага двара, на ўсіх вуліцах і завулках.

Т. ЛУГАВАЯ